کیمرون اٹی اوآئی سی نا جموں وکشمیر نا بارواٹی رابطہ گروپ نا دیوان، پاکستانی ڈل انا کماشی ءِ سیکرٹری خارجہ محمد سائرس سجاد قاضی کرے

اسلام آباد۔ 30 اگست (اے پی پی) جموں وکشمیر نا بارواٹی اوآئی سی نا رابطہ گروپ نا دیوان کیمرون نا شار یاؤنڈے ٹی او آئی سی کونسل آف وزراء خارجہ نا 50 می دیوان نا وخت آ اڈ ہلک، دیوان نا کماشی ءِ سیکرٹری جنرل اوآئی سی حسین ابراہیم طحہٰ کرے، پاکستانی ڈل سیکرٹری خارجہ محمد سائرس سجاد قاضی ناکماشی ٹی شریک مس۔ جمعہ نادے آ ترجمان دفترخارجہ نا کنڈآن جاری بیان نا رداٹ اوآئی سی نا سیکرٹری جنرل حسین ابراہیم طحہٰ نا کماشی ٹی مروک آ دیوان اٹی سعودی عرب، ترکی، نائیجر، آذربائیجان، اوآئی سی نا آجو آخبتی انسانی حق کمیشن(آئی پی ایچ آرسی) و کشمیری الس نا حقی نمائندہ غاک بشخ ہلکر۔ دیوان اٹی پاکستانی ڈل انا کماشی ءِ سیکرٹری خارجہ محمد سائرس سجاد قاضی کرے۔ سیکرٹری خارجہ رابطہ گروپ ءِ بھارت نا غیرکانودی وڑاٹ کوزہ ٹی جموں و کشمیر نا بھلا حالیت آتیان معلومدار کرے۔ اوسلامتی کونسل نا تعلقدار قرارداد آتا خلاف ورزی و کوزہ ٹی جموں وکشمیر آ کوزہ ءِ سوگو کننگ نا بھارت نا کوشست آتا ذکرءِکرے ہراٹی دھڑکو و خوف انا چاگڑد ودی کننگ ہم اوار ءِ۔ اوبھارت آ زور شاغا کہ او تینا کوزہ ٹی جموں وکشمیر اٹی غٹ سیاسی بندی تے یلہ کے، کالعدم سیاسی جماعت آتیان پابندی تے ہرفے، 5 اگست 2019 نا غیرکانودی و اسہ کنڈی گام گیج ءِ منسوخ کے و  اقوام متحدہ نا سلامتی کونسل نا تعلقدار قراردادآتیا عملدرآمد کرفے۔ رابطہ گروپ کشمیری الس ناحق خودارادیت نا دوئی کننگ نا جہد نا مخ تفی نا درشانی ءِ کرے ہراٹی اقوام متحدہ نا سلامتی کونسل نا تعلقدار قراردادو کشمیری الس نا است خواہی تا رداٹ جموں وکشمیر نا جھیڑہ نا زوت و پرامن ایسری آ زور شاغنگانے۔ رابطہ گروپ امنائی وڑاٹ اسہ اسیجائی اعلامیہ اس ہم منظور کرے ہراٹی داہیت آ زور شاغنگاکہ سویلی ایشیاٹی پائیدار امن و سوگوی جموں وکشمیر نا جھیڑہ نا اقوام متحدہ نا سلامتی کونسل نا قرارداد و کشمیری الس نا است خواہی تا رداٹ گڈیکو ایسری آ ٹی ءِ۔