کوئٹہ۔ 30 اگست (اے پی پی) سینیٹ نا فنکشنل کمیٹی انسانی حق انا دیوان سینیٹر ثمینہ ممتاز زہری نا کماشی ٹی اینو پارلیمنٹ ہاؤس اٹی مس۔ میٹنگ نا بناء ’’دی نیشنل کمیشن آن دی رائٹس آف چائلڈ (ترمیمی) بل ‘‘ 2023نا سرحال آن بل آ شرہ غان مس۔ سینیٹر ڈاکٹر زرقاسہروردی چندی بشخ آتیٹی چناتا سرجز آتا معائنہ و چاروکی نا گرج آ زور شاغا و داہیت آ زور شاغا کہ چناتا حق انا رکھ کمیٹی نا باسک آتا اسیجائی مسخت ءِ۔ بنجائی وزیر کانود ، انصاف ، انسانی حق، (MoHR)سینیٹر اعظم نذیر تارڑ کانود سازی نا زبان ءِ گچین کننگ نا گرج آ گپ وتران کرے۔ قومی کمیشن حق اطفال (NCRC)نا چیئرپرسن گودی عائشہ رضافاروق داہیت ءِ مون آ تخا کہ ڈیٹا ءِ مرتب کننگ و المی معلومداری نا فراوانی ءِ پک کننگ کن تعلقدار کمامدارآتون کمکاری کننگ اٹ اہم پیش رفت مسنے۔ اومیٹا انٹرنیشنل اتون ہم گرنچی و ’’ٹیک اٹ ڈاؤن‘‘ نا پن اٹ اسہ ایپ اسے نا بناءِ کننگ نا ہم ذکر ءِ کرے ، ہراخاص وڑاٹ 18 سال آن کم وئی چناتیکن ڈیزین کننگانے۔ ’’ٹیک اٹ ڈاؤن‘‘ اسہ مفت سروس اسے ہرا نا مسخت فحش مواد ءِ توننگ ءِ۔ سینیٹر تارڑ زور شاغساپارے کہ اسہ گھنٹہ ٹی فحاش مواد آتے اینک کننگک و مواد آتا ذریعہ ءِ بلاک کننگک۔ اومستی پارے کہ اونا ارٹ میکو ریسہ ٹی 18 سال آن زیات وئی نا ورناک ہم داایپ ءِ کاریم اٹ اتنگ کیرہ۔ داکان بیدس کمیٹی باسک آک امنائی وڑاٹ سینیٹر لیاقت خان تراکئی ءِ دُوارہ سینئرسٹیزن کونسل نا باسک پندار کننگ آ امنا کریر۔ چیئرپرسن سینیٹر ثمینہ ممتاز زہری ’’ٹیک اٹ ڈاؤن‘‘ ایپ گام انا ستاءِ کرسا داہیت آ زورشاغا کہ چناک ننا آخبت نا میرات آک ءُ، و اوفتیان بھاز انگا تینا رکھ ءِ کننگ ءِ تپسہ ، اوفتا لمہ و باوہ گیشتر داوڑنا ویل آتیان بے سمامریرہ۔ کمیٹی باسک آک 18 می ترمیم نا رداٹ صوبہ غاتون ڈیٹاشیئرکننگ آ سرجمی اٹ گپ وتران کریر۔ سینیٹر ثمینہ ممتاز زہری پیدوار کرے کہ 18 می ترمیم صوبہ غاتون ڈیٹا شیئرکننگ آ پابندی خلپک۔ اوداہیت آ ہم زور شاغا کہ صوبائی کمامدارآک گیشتر دا باندات آتے چنکو ہلیرہ ہرانا سوب آن رپورٹ کروک حساب وکتاب اٹی تضاد ودی مریک۔ اواست ہسونی نا درشانی ءِ کرے کہ داوڑنا غفلت انسانیت نا برخلاف ڈوہ اسے۔ کمیٹی نا چیئرپرسن سینیٹر ثمینہ ممتاز زہری پنجاب و کے پی کے ٹی زالبول و چناتا برخلاف ڈوہ انا ودوک آ کچ آ تینا گڑتی تا درشانی ءِ کرے۔ پنجاب پولیس نا کنڈآن شیئرکروک آ دستاویز آتا کمک اٹ داہیت مون آبس کہ پنجاب اٹی زالبول آتیا اُرائی بیدادی نا 10201 آن زیات کیس بیرہ 2023اٹی پنجاب اٹی مون آ بس۔ کے پی کے پولیس نا جمع کرفوک آ دستاویز آتا رداٹ ڈوہ و زالبول و چناتا مقدمہ غاتیٹی سزا نا کچ بیرہ 5.2 درسد ئس۔ چیئرپرسن تعلقدار صوبہ غاتا پراسیکیوشن و پولیس کمامدارآتون سرجمی اٹ گپ وتران کرے تانکہ اوفتا تعلقدار جاست وپاست و استغاثہ نا وڑوڈول اٹی خامی تے ماس کش کننگ ناسلاہ مون آبس۔ اوداغٹ کیس آتا تازہ انگا تاریخ نا تیاری ٹی تعلقدار محکمہ غاتا سنجیدگی نا کمتی ا تینا گڑتی نا درشانی ءِ کرے۔ داکان بیدس ، ڈی آئی جی انویسٹی گیشن مانیٹرنگ پنجاب جنوری 2021 آن 2024 اسکان جنسی بیدادی، خون، عصمت دری ، تیزاب گردی ، و اُرائی بیدادی ناحساب وکتاب پیش کرے۔ دیوان اٹی سینیٹر ڈاکٹرزرقا سہروردی تیمور، سینیٹر سید علی ظفر، سینیٹر محمد ہمایوں مہمند، سینیٹر پونجوبھیل،سینیٹر رانا محمود الحسن ، بنجائی وزیر کانود، انصاف و انسانی حق، سینیٹر اعظم نذیر تارڑ ، سیکرٹری حوالکاری وایلوفک بشخ ہلکر۔ وزارت انسانی حق، قومی کمیشن حق اطفال نا چیئرپرسن عائشہ رضا و تعلقدار محکمہ غاتا بڑزکو کمامدارآک ہم داوخت آساڑی ئسر۔
