کوئٹہ۔ 30 اگست (اے پی پی) کوئٹہ ٹی ساڑی آ پِر تیان پد ڈیم تیٹی دِیر انا کچ اٹی ودکی مسنے ولے غٹ ڈیمک رکھوک ءُ، محکمہ ایری گیشن نا انجینئر دے و نن ڈیم تا چاروکی ءِ کننگ اٹی ءُ، اسہ ڈیم اسے ہم خطرہ اف۔ داہیت ءِ ایگزیکٹیو انجینئر ایری گیشن کوئٹہ ڈویژن عبدالکبیر کوئٹہ نا کیبی ٹی واقع ڈیم تا معائنہ نا وخت آ گپ وتران کرساپارے ، داوخت آ ایس ڈی او کوئٹہ جہانزیب ہم ساڑی ئس۔ عبدالکبیرپارے کہ کوئٹہ شار اناکیبی ٹی داوخت آ 50 نا خڑک ڈیم ساڑی ءُ، ہرافتے ٹی ساڑی آ پِر تیان پد دیر انا کچ بڑز مسنے ولے اسہ ڈیم اسے نا ہم پِننگ نا خطرہ اف، چیف سیکرٹری بلوچستان، سیکرٹری ایری گیشن و چیف انجینئر نا پارت آ محکمہ ایری گیشن نا انجینئر غٹ ڈیم تا دے و نن چاروکی ءِ کننگءُ۔ اوپارے کہ ہنہ فلڈ ایری گیشن اسکیم نارداٹ نوکاپی دیر ہنہ جھیل اٹی پترینگ انگ ءِ ہراٹی جھیل انا کچ ہم بڑز مننگ ءِ۔ اوپارےکہ ساڑی آ پِر تیان پد ڈیم تیٹی دِیر بننگ آن دیر انا کچ بڑز مریک گڑاس زموار ڈیم تا بارواٹی غلط ہوکا کننگ ءُ الس سٹی آ ہوکاتیا خف توپ۔ اوپارے کہ الس محکمہ ایری گیشن نا نالہ غاتیا تجاوزات جوڑ کننگ آن پاناد کے، تانکہ ہروڑنا وجونی ومالی نسخان تیان بچنگ مرے۔ اوپارے کہ محکمہ ایری گیشن نالہ غاتیا تجاوزات آتا برخلاف بے پرخ کارروائی کیک و کس اسے ہم ایری گیشن نانالہ غاتیا کوزہ کننگ نا موکل تفک۔
