یکجا مرسا نن پاکستان ءِ زوت تینا نت تیا سلفنہ، پاکستان زرگزرانی واک اس جوڑمریک، وزیراعظم شہباز شریف نا بنجائی کابینہ غان تران

اسلام آباد۔ 30 اگست (اے پی پی) وزیراعظم محمد شہباز شریف پارینے کہ کشاری شونداری، برآمد آتیٹی ودکی،ہندی صنعت نا مون آ دننگ، ورناتے فنی مہارت و روزگارنا فراوانی نا بابت پنچ سال انا زرگزرانی پلان اس شین تننگ انگ ءِ، یکجا مرسا نن پاکستان ءِ زوت  تینا نت تیا سلفنہ و دازرگزرانی واک اس جوڑمریک۔ اوجمعہ نادے آ داڑے بنجائی کابینہ نا دیوان آن تران کریکہ۔ وزیراعظم محمد شہباز شریف کابینہ نا باسک آتا ستا ءِ کرساپارے کہ تدوک آ دے او کوئٹہ نا دورہ ءِ کرے ہراڑے شہید آتا خاہوت آتون ہڑزخواہی کرے، اوفتا حوصلہ بھاز بڑز ئس، ہموڑے 26 اگست آ ہرا ماحول ءِ جوڑ کننگا، اونا مسخت دائس کہ داباور کرفنگے کہ ہموڑے علیحدگی ناتحریک اس چلینگ انگ ءِ، دادے آ انتس کہ مس او دہشت گردی نا کاٹم آن گدرینگ انگ ئس ہرانا اخس کہ مذمت ءِ کننگے کم ءِ، دورہ ٹی ہموڑے کورکمانڈر کوئٹہ نا کنڈآن دہشت گردی و ساڑی آ حالیت آتیا حوال تننگا کہ ہراوڑ دہشت گرد و خارجی زموار آک پیشن نا کمک آن اواری اٹ خار انا بج آتے دسنگ ءُ، ہموڑے وزیراعلیٰ سرفراز بگٹی نا کماشی ٹی سویلین حکومت بلوچستان نا شونداری و شونہالی و ورناتیکن گچین پروگرام ہلسا چلینگ انگ ءِ ہراستاکڑزک۔ پاک فوج دہشت گردآتا پدرندءِ خلنگ ءِ، بنجائی و صوبائی حکومت آک اوڑتون سلوک ءُ۔ اوپارےکہ دورہ ٹی لیویز ءِ پوسکن آازباب آتا فراوانی نا بابت ہم گپ وتران مس، اوفتےپوسکن آ ازباب آتا فراوانی کن صوبائی حکومت نا ہرممکن کمک ءِ کینہ۔ وزیراعظم پارے کہ دورہ ٹی سیاسی جماعت آتا زعماء تون ہم اوڑدہی مس، او غٹ محب وطن و بلوچستان نا شونداری و شونہالی نا خواہندار ءُ، اوفتا روا مشورہ غاتے بنگونن، اوفتیا پورو عمل کینہ۔ اوپارے کہ دہشت گرد و پاکستان مخالف آتون گپ وتران نا سوج ہی ودی مفک ولے ہرا ورناتے چندی بیانیہ غاتے اٹ گمراہ کننگ انگ ءِ، اوفتے قومی دنگ اٹ اتنگ کن ہرممکنہ گام گیج کننگک، بلوچستان نا ورناتیکن چائنہ ٹی اسکالرشپ تون اوار لیپ ٹاپ و ایلو پروگرام تیٹی اوفتے ایلو ملک انا ورناتیان 10درسد زیات کوٹہ تننگ انگ ءِ، بلوچستان اٹی ٹیوب ویل آتے سولر آ گدریفنگ کن 55 ارب روپئی جتا کننگانے، سی پیک آن بلوچستان نا مخلوق فائدہ ہرفنگ ءُ، چین ننا پکا سنگت ءِ، چینی تا برخلاف دہشت گردی داسنگتی ٹی اڑاند شاغنگ و سی پیک نا کمک اٹ السی شونداری نا کسر اٹی اڑاند شاغنگ آنبار ءِ۔ اوپارے کہ بلوچستان نا وزیراعلیٰ تون اواری اٹ بنجائی حکومت ہرممکنہ گام گیج کیک، دشمنان پاکستان ءِ کانود نافذ کروک آ ادارہ و سیکورٹی فورس آتون اواری اٹ مقام عبرت جوڑ کینہ، داڑآن بیدس شونداری وشونہالی نا سفر مو ن آ ہِننگ کپک۔ وزیراعظم پارے کہ موڈیز پاکستان نا ریٹنگ اٹ گچینی نا پڑو کرے ہرا پاکستان نا زرگزرانی حالیت آتا گچینی نا اعتراف ءِ، ولے دا مرغن ءُ سفر اسے واوڑآ عزم اٹ چلینگوئی مریک، پاکستان نا شونداری نا سفر آ حکومت آک و قوم متحد ءُ۔ وزیراعظم پارے کہ حکومت اسہ زرگزرانی پلان اس جوڑ کرینے ہراڑآ ترندی اٹ کاریم مننگ ءِ ہرا زوت قوم انا مون آ اتینہ، دا پنچ سال انا ڈٹ انا ہدف آتیٹی کشاری شونداری، برآمد آتیٹی ودکی، ہندی صنعتءِ مون آ دننگ ، ورناتے فنی مہارت و روزگار نا فراوانی اوار ءُ۔ وزیراعظم پارے کہ ننے جانفشانی اٹ مون آ ہنوئی ءِ، مشکل آتا مقابلہ ءِ عزم و یکسوئی اٹ کروک آ قوم تا کسر ءِ کس اس توننگ کپک، خواری و سیوت اٹ پاکستان تینا نت تیا سلنگ و زرگزرانی واک جوڑ مریک ۔