اسلام آباد۔ 30 اگست (اے پی پی) وزیراعظم یوتھ پروگرام نا چیئرمین رانا مشہود احمد خان پاکستان سٹریٹ فٹ بال ٹیم ءِ قوم انا گمر گوندسا پارینے کہ گوازی نا پڑاٹی خواری اٹ آسمان آسرمننگ کینہ، وزیراعظم یوتھ پروگرام نا درگہ ورناتیکن ملوک ءِ۔ داخیال آتا درشانی ءِ او پنچ شنبے نادے آ پاکستان سٹریٹ فٹ بال ٹیم انا اعزاز اٹی انعام بشخنگ نا دود آن تران کرساکرے۔ اوپاکستان سٹریٹ فٹ بال ٹیم نا گوازی گر قوم انا گمر ءُ ہراداڑے تولوک ءُ۔ اودنیا ٹی پاکستان نا پن ءِروشنا کرینو و سوزہلالی بیرک ءِ بڑزکرینو۔ گوازی نا پڑ اٹی نم اگہ خواری کیرے تو آسمان اسکان سرمننگ کیرے۔ اوپارے کہ پاکستان آسانی اٹ دوئی متنے ، ننا باوہ پیروہ داڑکن بھلو قربانی تسنو۔ اوپارےکہ داورناک پاکستان نا بارواٹی منفی تاثرءِ زائل کننگ کیرہ۔ اوپارےکہ زرگزران تون اوار ہرکنڈآن مثبت خبربننگ ءِ۔ اوپارےکہ دانش اسکول ءِ مچ آپاکستان اٹ دننگ اُن۔ اوپارے کہ ورناک ننا بھلا میرات ءُ، مچ آ دنیا غان پاکستان آن کسبکار بندغ خواہنگ انگ ءِ، وزیراعظم یوتھ پروگرام نا رداٹ ورناتے کسبکار کننگ کن فنی تربیت تننگ انگ ءِ، وزیراعظم یوتھ پروگرام نادرگہ ورناتیکن ملوک ءِ۔ رانا مشہود احمد پارےکہ حکومت آئی ٹی سیکٹر نا مون آ دننگ آ پبی چکار کننگ ءِ، بروک آ منہ سال آتیٹی آئی ٹی سیکٹر نابرآمد آتے اِرا ٹک پنچ ارب ڈالر آن 25 ارب ڈالر اسکان دینہ۔
