اسلام آباد۔29اگست (اے پی پی):ملک ءِمستر آصف علی زرداری ءَ پیرس اولمپکس 2024 ءَ مرد آنی جیولن تھرو ءَ جوانیں کار کرد آنی پد ءَ اولمپک گولڈ میڈل در جنوک ارشد ندیم ءَ را ہلال امتیاز ءِ شرپ دات، آءیءَ ارشد ندیم ءِ واستہ وتی نیمگ ءَ چہ 10 کروڑ کلدار ءِ داد دیگ ءِ جار ھم جت۔ صدر مملکت ءَ اولمپک گولڈ میڈلسٹ ارشد ندیم ءَ را پنچ شمبے ءِ روچ ءَ ادا ایوان ءِ صدر ءَ برجمیں یک سادگیں ءُ ھاسیں مراگشے ءَ ہلال امتیاز ءِ شرپ دات۔ مراگش ءَ چیئرمین سینیٹ سید یوسف رضا گیلانی، بنجاھی وزیر ، پارلیمنٹ ءِ باسک، در ملکی سفیر ، جتا جتائیں لیب ءُ گوازی آنی لیبی، پیسریگیں اولمپیئنز آفیشلز ءُسول ءُ اردی کارندہ آں بھر زوری کت۔ ایشی ءَ ابید صدر آصف علی زرداری ءَ گوں ارشد ندیم ءَ گند ءُ نند ھم کت۔ اے موہ ءَ ارشد ءِ کوچ سلمان اقبال بٹ ، سیکرٹری وزارت بین الصوبائی رابطہ ندیم ارشاد کیانی، ڈائریکٹر جنرل پاکستان سپورٹس بورڈ محمد یاسر پیر زادہ ءُ ٹوھیں سرکاری اپسرگ ھم ساڑی اتنت۔ صدر مملکت ءَ گوشتگ کہ ارشد ندیم ءَ اولمپک ریکارڈ جوڑ کنان ءَ ملکءِ شرپ ءَ را برز تر کتگ۔ آئی ءَ گوشت کہ ارشد ندیم ءِ جوانیں کامیاتی، یک شلیں محنت ءُ کوشست آناں ساڑات۔ آئیءَ گوشت کہ ارشد ندیم ءَ 92.97 میٹر تھرو کتگ ءُ اولمپک ریکاڈ ءِ جوڑ کتگ ءُ ملک ءِ شرپ ءَ را گیشتر برز کتگ۔ اولمپک گوعلڈ میڈلسٹ ارشد ندیم ءَ ہلال امتیاز ءِایوارڈ دیگ ءِ پد ءَ صدر مملکت ءِ شگر ءُ منت واری گپت۔ اے موہءَآءیءَ جیولین تھرو ایونٹ ءِ میاں اوستمانی ریکاڑ پروشگ ءِجزم ءِ درشان کت۔ آئی ءَ وتی ھاندان ءُ راج ءِدعا ءُ نیکیں واھشت آنی پد ءَ شگر ءُ منت واری گپت۔ صدر مملکت ءَ ارشد ندیم ءِ کامیاتی ءَ سروکی کنگ ءِپد ءَ کوچ سلمان اقبال بٹ ءِ ازمت آناں ھم ساڑات۔
