اسلام آباد۔29اگست (اے پی پی): حزانگءِ بنجاہی وزیر سینیٹر محمداورنگزیب ءَ نجی پڑءِ زرکاری ءِ ھاترءَ جوانیں ماحول ودی کنگءِ حوالگءَ حکومتءِ جزم ءِ درشانی کتگءُ گشتگ کہ زرکاری ءِ کارءَ را تچک کنگءُ درملکی زرکاراناں آسراتی دئیوکیں پالیسی جوڑ کنگ بوھگءَ ایں۔ آئیءَ اے گپ پنچ شمبے ءِ روچءَ پاک برونائی انویسٹمنٹ کمپنی لمیٹڈ ءُسعودی پاک انڈسٹریل اینڈ ایگریکلچرل انویسٹمنٹ کمپنی ءَ ہوار یکجاہی زرکاری کمپنی آنی نمائندگانی گوما چارءُ تپاسی دیوان ءِ سروکی کنانءَ کتگ، دیوان ءَ کمپنی آنی کتگیں کار، جیڑھ ءُ جنجال ءُ بانداتءِ منصوبہ آنی چارءُ تپاسی کنگ بوتگ۔ دیوان ءَ دوئیں کمپنی آنی سینئر مردم ہوار بوتگ اَنت۔ سی ای او پاک برونائی انویسٹمنٹ کمپنی لمیٹڈ (پی بی آئی سی ایل)ءَ کمپنی ءِ پورٹ فولیو ءُ پاکستان ءَ حاسیں گامگیجانی باروا لُکّیں چمشانکے پیش کتگ۔ آئی ءَ حزانگءِ وزیر ءَ را پاکستان ءُ برونائی ءِ نیام ءَ اقتصادی کمک ءَ را گیش کنگءَ پی بی سی آئی ایل ءِ کردءِ بابتءَ سرپد کتگ۔ آئیءَ گشتگ کہ مالیاتی ازمت، رئیل سٹیٹ ءُ ایس ایس ای ء ِ کمک ءِ وسیلگءَ صنعت ءُ کشتءُ کشاری ءِ پڑآں زرکاری ءِ آسراتی دئیگ بوتگ، کمپنی ءَ اے پڑآنی تہا ھاسیں کار کتگءُ اے نتیجگ ءَ دونیمگی بیپاری ءُ اقتصادی محکمی گیش بوہگءَ ایں۔ سی ای او سعودی پاک انڈسٹریل اینڈ ایگریکلچرل انویسٹمنٹ کمپنیءَ ملک ءِ تہا اسلامی مالیات ، دیجیٹل فنانس، بیپار، کشتءُ کشاری ءُ لائیوسٹاک ءِ گیشی ءِ ھاترءَ کمپنی ءِ حاسیں دیمروئی گامگیجانی ہوالگءَ پریذنٹیشن ہم داتگ۔ دیوان ءَ اے کمپنی آنی آپریشن آنی بازیں تکءُ پھناتاں ہوار زرکاری ءِ حکمت عملی ، کارءُ کردءِ چارءُ تپاسی ءُ بازیں اوشتانی سرءَ ہم ھیالءُلیکہ ءِ درشانی کنگ بوتگ۔ حزانگءِ وزیر ءَ دوئیں کمپنی آنی ردءَ را ساڑاتگ۔ آئیءَ گشتگ کہ لھتیں سالاں اہداگءِ حاصل کنگءِ ہوالگءَ سعودی عرب ءِ وژن 2030 لکھ ستاہ کرز ایت ءُ پاکستان اے ہوالگءَ سعودی عرب ءِ تجروبتاں چہ پائدگ چست کت کنت۔ حزانگءِ وزیر ءَ گشتگ کہ حکومت نجی پڑءِ زرکاری ءِ ھاترءَ جوانیں چاگرد ئیگءِ جزمءَ کنت، آئیءَ تچکءَ تچک درملکی زرکاراناں اے نیمگءَ دیم کنگءَ دوئیں کمپنی آنی کرد ءُ منصوبہ آنی ارزشت ءِ سرءَ زور پِر داتگ۔ آئیءَ گشتگ کہ زرکاری ءِ عملءَ را تچک کنگءُ درملکی زرکاراناں آسراتی سرکنوکیں پالیسی جوڑ کنگ بوھگءَ ایں۔
