کوئٹہ۔ 29 اگست (اے پی پی) وزیراعظم میاں محمد شہباز شریف پارینے کہ نن مصمم ارادہ و اجتماعی بصیرت اٹ بلوچستان اٹی دہشت گردی ءِ پورو چٹفنہ و دہشت گردآتے اوفتے اوفتا کروک نا سزاایتنہ، بلوچستان اٹی پیش بروک آ ساڑی آ است ہسون واقعہ غا مچ آ پاکستانی قوم غمزدہ ءِ، دہشت گردی ناگندہ انگا ڈٹ انا رداٹ بے گناہ پاکستانی تا دتر ءِ وہیفوک آ خارجی دہشت گرد آتا کاٹم ءِ کُننگک۔ داخیا ل آتا درشانی ءِ او پنچ شنبے نادےآ کوئٹہ ٹی نیشنل ایکشن پلان نا صوبائی ایپکس کمیٹی نا دیوان آن تران کرساکرے۔ داوخت آ چیف آف آرمی اسٹاف جنرل عاصم منیر، نائب وزیراعظم و بنجائی وزیر خارجہ اسحاق ڈار، گورنر بلوچستان شیخ جعفر خان مندوخیل ، وزیراعلیٰ بلوچستان میر سرفراز بگٹی ، بنجائی وزیر داخلہ محسن نقوی ، بنجائی وزیر ڈٹ بندی احسن اقبال، بنجائی وزیر حوالکاری عطاء اللہ تارڑ، بنجائی وزیر واپار جام کمال ، کورکمانڈر بلوچستان راحت نسیم احمد، چیف سیکرٹری شکیل قادر و ایلوفک ہم ساڑی ئسر۔ وزیراعظم شہباز شریف پارے کہ 26 اگست آ بلوچستان اٹی دہشت گردی نا ہرا واقعہ پیش بس او بےکچ است ہسون ءِ دا واقعہ غان مچ آپاکستان نا الس اٹ تشویش نا لہراس تمانے، دا است ہسون واقعہ غا مچ آ پاکستانی قوم غمزدہ ءِ، ولے نن پیدوار کینہ کہ نن اجتماعی بصیرت و قوت ارادی و بدل مفروک ارادہ اٹ بلوچستان اٹی دہشت گردی ءِ پورو چٹفنہ، بلوچستان پاکستان نا اسہ اہم و زیباءُ صوبہ اسے ہرانا شونداری و شونہالی نا کسر اٹ غٹ اڑاند آتے مرکننگک۔ وزیراعظم پارے کہ پاکستان اٹ خارجی زموار آک دہشت گردی نا ڈٹ جوڑ کریر و بے گناہ پاکستانی تا دترءِ وہیفیر ہراٹی کانود نافذ کروک آ ادارہ، ایف سی ، لیویز کارندہ غاتون اوار لس شاریک اوار ءُ، ولے شہید آتا دتر زیان مفک۔ وزیراعظم پارےکہ داٹی ہچ ءُ شک اس اف کہ اللہ تعالیٰ نا فضل و کرم اٹ پاکستان نا فوج، چیف آف آرمی اسٹاف جنرل عاصم منیر و وزیراعلیٰ بلوچستان نا لیڈرشپ اٹی بنجائی حکومت نا پورو کمکاری اتون دہشت گردی ءِ ماس کش کینہ، دہشت گردی مچ آ پاکستان اٹی 2018 غان پد ہرا دُوارہ کاٹم ہرفینے اونا کاٹم ءِ کُننگک، پاکستان نا شونداری و شونہالی کن غٹ ءِ اواری اٹ مون آ بروئی مریک۔ وزیراعظم شہباز شریف پارےکہ قائد اعظم محمد علی جناح ؒ، علامہ اقبال ؒ نا کسر آ ہنسا وطن عزیز نا سوگوی کن تینا جون تے ندر کروک آتا قربانی تے زیان مننگ کن الیپنہ۔ وزیراعظم دا عزم انا درشانی ءِ کرے کہ مصمم ارادہ اٹ اجتماعی کوشست آتے اٹ دہشت گردی ءِ چٹفنہ۔
