نیویارک۔ 29 اگست (اے پی پی) اقوام متحدہ ٹی پاکستان نا آخبتی مندوب منیر اکرم دنیا ءِ مون تروک بھلو چیلنج آتیا گڑتی نا درشانی ءِکرسا پارینے کہ غزہ ، یوکرین، افریقہ،سویلی ایشیا و بحیرہ سویلی چین کون آ جہانی و علاقائی جھیڑہ غاتیٹی ودکی جہانی امن وسلامتی نا نظام ءِ بھس کننگ نا کنڈآ پیدوار اشارہ غاک ءُ۔ پاکستانی مشن نا کنڈآن جاری پریس ریلیز نا رداٹ او تدوک آ دے پاکستانی مشن اٹی فلبرائٹ اسکالر پروگرام نا اسکالر آتا اسہ گروپ اسے تون گپ وتران کرسا جہانی امن و سوگوی ءِ پک کننگ کن اقوام متحدہ نا چارٹراٹی نوشتہ اصول و مسخت آتیا عمل کننگ نا گرج آ زور شاغا، ولے پاکستانی مندوب خبڑدار کرے کہ دا اصول آتا پدریسہ خلاف ورزیک دنیا ءِ بھلو خطرہ سے نا گواچی کرینو۔ اوپارے کہ دا جھیڑہ غاتے ایسر کننگ اٹ کثیر الجہتی نظام نا بے سہبی جہانی کمکاری نا بنداوی اصول آتیکن قول انا پوسکنی نا گرج آ زور شاغک۔ گروپ اٹی پاکستان تون اوار چندی ملک آتیان تعلق تخوک آ فلبرائٹ اسکالر آک چندی امریکی یونیورسٹی تیٹی ماسٹرو پی ایچ ڈی نا ڈگری دوئی کننگ اٹی ءُ۔ پاکستانی مندوب اقوام متحدہ نا سیکرٹری جنرل نا گام سمٹ آف دی فیوچر (ایس اوٹی ایف)) نا بارواٹی ہیت کرسا پارے کہ دانا مسخت مون آ بروک چیلنج آتون مون تننگ کن کثیر الجہتی گام گیج اسہ پوسکن ءُ جہانی امنائی سلاہ ودی کننگ ءِ، ولے، او خبڑدار کرے کہ اقوام متحدہ نا کثیر الجہتی نظام ءِ ویٹوپاور نا کاریم اٹ اتنگ کون آ موروثی ساختی ویل مون تروک ءِ، ہرا اقوام متحدہ نا مینڈیٹ ءِ پورو کننگ نا لائخی ٹی اڑاند شاغانے۔ پاکستانی مندوب چندی جہانی چیلنج آتا پیدواری کرے ہرافتے ٹی چاگڑدی بدلی، ٹیکنالوجی ناشونداری نابابت گہری مروک تقسیم، پدتموک ملک آتیکن شونداری مالیات اسکان بے بریبری رسینگ و جوہری تصادم نا ودوک آ خطرہ اوار ءِ۔ اوخبڑدار کرے کہ دا چیلنج جہانمی سلامتی نا منظرنامہ ءِ تہار کننگ ءِ و داڑتون مون تننگ کن گام گیج آتا بابت دمدستی وڑاٹ جہانی ہم گرنچی نا گرج ءِ۔ منیر اکرم سویلی ایشیا غا چکار کرسا، داہیت انا درشانی ءِ کرے کہ جموں وکشمیر نا ایسر مفروک آ جھیڑہ نا سوب آن ڈیہہ اسہ جوہری فلیش پوائنٹ اس جوڑ مسنے۔ اوعلاقائی امن و سوگوی ءِ پک کننگ کن دا ویل انا انصاف اٹ و دیرپاایسری نا گرج آ زور شاغا۔ اوچاگڑدی بدلی نا تباہ کن اثر کون آ نوکاپ نابھسکاری، ترند انگا باسنی وطوفان نا ودوک آ خطرہ غاتے ہم مون آتخا۔ منیر اکرم شون ہلوک ملک آتا کنڈآن موسمیاتی موافقت و تخفیف کن کروک آ گنج اس مفروک مالی قول آتیا تنقید کرے۔ اودلیل تس کہ اسہ کھرب ڈالر نا فنڈنگ نا فراوانی تنکی تون جوان وڑاٹ مون تننگ کن درکار دہ کھرب ڈالر آن بھاز کم ءِ۔ پاکستانی مندوب چندی پدتموک ملک آتیٹی ودوک آ نیزگاری و پدسلنگ آ گڑتی نا درشانی ءِ کرے۔ اوانکشاف کرے کہ کم و ود 150 ملین بندغ زوت آتے اٹ دُوارہ نیزگاری نا پنجہ ٹی ہنانو۔ او800 ملین بندغ آتے نیزگاری آن کشنگ اٹ چین نا سرسہبی ءِ امنا کرسا داہیت نا پیدواری ءِ کرے کہ ایلو پدتموک ملک آک جہانی سپلائی چین اٹ اڑاند، خور و ایندھن نا ودوک آ نہاد و وام تا بھاریم آن بھاز زہمی مسنو۔
