اسلام آباد۔ 29 اگست (اے پی پی) ڈپٹی چیئرمین سینیٹ سیدال خان تون بلوچستان آن تعلق تخوک آ قبائلی سرکڑدہ، مشر و راہشون تا ڈل پارلیمنٹ ہاؤس اٹی اوڑدہی کرے۔ پنچ شنبے نادے آ سینیٹ سیکرٹریٹ آن جاری بیان نا رداٹ ڈپٹی چیئرمین سینیٹ قبائلی سرکڑدہ غاتیا تالان ڈل ءِ ببو خیراٹ پارے و اوفتے پارے کہ داننکن بھلو شرفمندی نا ہیت اسے کہ بلوچستان نا سرکڑدہ غاتا ڈل پارلیمنٹ نا دورہ ءِ کننگ اٹی ءِ۔ ڈپٹی چیئرمین سینیٹ قبائلی رسم و رواج، دودوربیدہ و زند اناطرزانا ستاءِ کرے وپارے کہ پاکستان اٹ رہینگوک آ غٹ دودوربیدہ غاتا تینا تاریخی حیثیت ءِ سرکڑدہ غاتون گپ وتران کرسا ڈپٹی چیئرمین سینیٹ پارےکہ دہشت گردی نا برخلاف جنگ اٹی قبائلی علاقہ غاک بھلو نسخان اس ہرفینو و اینو ہم بھاز انگا ویل مون تروک ءِ۔ اوموسیٰ خیل، لسبیلہ و ایلو ہند آتیا پیش بروک آ است ہسون واقعہ غاتا ہم ذکر ءِ کرے و پارے کہ بے گناہ شاری تے شست کننگ و ملک دشمن کارروائی تا اخس کہ مذمت ءِ کننگے کم ءِ۔ داوخت آ ڈپٹی چیئرمین سینیٹ شہید آتیکن دعاپاتیا ہم کرفے۔ ڈپٹی چیئرمین سینیٹ سیکورٹی فورس آتا بہادری نا ہم ستاءِ کرے و پارے کہ ملکی دفاع آ سلوک ورناک تینا جون ءِ دلدست آ تخسا دہشت گرد آتا مقابلہ ءِ کننگ ءُ۔ مچ آ قوم انا دعاک و مخ تفی سیکورٹی فورس آتون ءِ۔ بلوچ قبائلی سرکڑدہ غاتون گپ وتران اٹی ڈپٹی چیئرمین سینیٹ صوبہ نا شونداری کن اواری اٹ کاریم کننگ آ زور شاغا و پارےکہ قومی یکجہتی و سیوت اٹ نن ویل آتا مون ءِ توننگ کینہ۔ اوپارےکہ امن ءِ مون آ دننگ ، شونداری نا رفتار ءِ ترند کننگ کن غٹ ءِ مو ن آ بروئی مریک۔ سرکڑدہ غاک ڈپٹی چیئرمین سینیٹ نا خیال آتیان امنا کریر و صوبہ نا شونداری کن اواری اٹ کوشست کننگ نا عزم انا درشانی ءِکرے۔ داوخت آ سرکڑدہ غاتا ڈل ڈپٹی چیئرمین سینیٹ نا دراخ جوڑی کن ہم دعاکرے۔
