کوئٹہ۔ 28 اگست (اے پی پی): بلوچستان ءِ سروزیر میر سرفراز احمد بگٹی ءَ گشتگ کہ حکومت بلوچستان ءَ ورناہ آناں ریاست ءَ گوں نزیک کنگءِ ھاترءَ یوتھ پالیسی منظور کتگ ، اقلیت ءُ خواجہ سرآناں شرپ مندیں روزگار دئیگ ءُ بلوچستانءِ زمہ واریں شہری جوڑکنگ ءِ ھاترءَ راج دپتری تعلیمی پروگرام بندات کتگ، جمہوریت سروس ڈلیوری ءِ ایگ ایں، حکومت بلوچستان ہمک ضلع ءَدیمروئی منصوبہ بندات کنت۔ اے ھیالانی درشانی آئیءَ شہید بینظیر بھٹو اسکالرشپ پروگرام ءِ ردءَ بلوچستان ایجوکیشن انڈومنٹ فنڈءِ وسیلگءَ نودربرآنی تہا تعلیمی زانگی اسکالر شپ چیک بہرءُ بانگی مراگشءَ گوں تران کنانءَ کتگ۔ اے موہءَ صوبائی وزیر ، چیف سیکرٹری بلوچستان، صوبائی سیکرٹریز ءَ ہوار ایندگہ حکام ساڑی بوتگ اَنت۔ مراگشءَ بلوچستان ءِ سروزیر ءِ نیمگءَ چہ نودربرآنی تہا چیک بہرءُبانگ کنگ بوتگ۔ باسکاں گوں تران کنان بلوچستان ءِ سروزیر ءَ گشتگ کہ بلوچستانءِ ورناہ بلوچستان ءُ پاکستان ءِ باندات اَنت۔ صوبائی حکومت ءَ مرچی وتی سوگند پیلو کتگ۔ بلوچستان ءِ سروزیر ءَگشتگ کہ نودربرآنی ھاترءَ اے پروگرام ءَ گیش کناں تنکہ بلوچستان ءِ اے نیزگاریں زھگ جوانیں وانگ جاہ آناں ونت بہ کناں ءُ پاکستان ءِ نامءَ روژناہ بہ کن اَنت، شہیدءُ اقلیت آنی زھگ ءُ ضلع ءَ جوانیں پوزیشن گروکیں نودرآناں ہم اے پروگرام ءِ بہر جوڑکنگ بیت۔ آئیءَ گشتگ کہ مئے چاگردءِ ڈلگ چار کتگیں تبک ٹرانس جینڈر ایں کہ ریاست آیانی ا ے ملک ءِ زمہ واریں شہری من ایت ءُشرپ مندیںموھ دئیگءِ جزمءَ کنت۔ بلوچستان انڈومنٹ فنڈکےءِ ردءَ ٹرانس جینڈرآناں ہم تیکنیکی اھیل کاری ءِ موہ دئیگ بنت۔ آئی ءَ گشتگ کہ صوبہ ءَ زھباری ءَ ہلاس کنگءِ ھاترءَ المی انت کہ تعلیم حاصل کنگءَ را ارزان جوڑ کنگ بہ بیت ءُ پہ ایشی ءِ ھاترءَ وانتءُ زانگءِ سرکنگءَ ہوار ورناہ آناں تکنیکی ءُ کسبی زانت کاری سرکنگ ءِ پروگرام ہم بندات کنگ بوتگ اَنت اے پروگرام ءِ یک بہرے کہ آئی ءِ ردءَ 30000 ورناہ آناں تکنیکی تعلیم سرکنگءَ عملدرآمد کنگ بوہگءَ ایں۔ بلوچستان ءِ سروزیر میرسرفراز بگٹی ءَگشتگ کہ گوستگیں روچاں بوتگیں ناشرکاری ءِ وئیلانی سرءَ باز اپسوز انت، بلوچ رسمءُ رواج کدی ہم بے گناہ ءُ معصومیں مردمانی حونانی ریچگءِ موکلءَ نہ دنت، بلوچ ورناہ آناں یک ایجنڈے ءِ ردءَ ریاستءَ چہ دور کنگ بوتگ۔ آئیءَگشتگ کہ صوبہ ءِ ورناہ آناں ریاستءِ نزیک کنگءِھاترءَ یوتھ پالیسی ءَ را کابینہ ءَ چہ منظور کنگ بوتگ۔ آئیءَ گشتگ کہ صوبہ ءِ ورناہ آناں ارزان کست ءِ سرءَ اخوت پروگرام ءِ وسیلگءَ وتی بیپارءِ بندات کنگءِ ھاترءَ وام دئیگ بوھگءَ اِنت۔ میرٹءِ بنیاتءَ کانٹریکٹ ءِ سرءَ نوکری دئیگ بیت۔ اے درستانی ھاترءَ درستاناں وتی ملک ءُ ریاست ءِ گوما محبتءِ سبوت دئیگ لوٹ ایت ءُمن سوگند کناں کہ میرٹ ءِ سرءَ کار بیت۔ ہمک ضلع ء ِ تہا دیمروئی ءِ منصوبہ برجاہ دارگ بنت۔ کسءَ را نوکری بہا کنگءِ موہ دئیگ نہ بیت ، اگاں کسے پہ نوکری ءِ ھاترءَ زر لوٹ ایت گڑا آئیءِ ویڈیوءَ جوڑ بہ کن اِتءُ مارا دیم بدے اِت ۔ آئیءَ ورناہ آناں گشتگ کہ شما درست سوسائٹی ءِ جوڑ کنگءُ دیمروئی ءِ تہا وتی بنکی کردءَ پیلو بہ کن اِت۔
