پاکستان برادر ملک ترکیہ تون واپار، زرکاری و تکنیکی کمکاری تون اوار چندی بشخ آتیٹی تعلقداری تے مون آدننگ کن سنبرینگوک ءِ، بنجائی وزیرخزانہ و محصولات

اسلام آباد۔ 28 اگست(اے پی پی) بنجائی وزیر خزانہ و محصولات سینیٹر محمد اورنگزیب پارینےکہ پاکستان برادر ملک ترکیہ تون واپار، زرکاری و تکنیکی کمکاری تون اوار چندی بشخ آتیٹی تعلقداری تے پین مون آ دننگ کن سنبرینگوک ءِ۔ اوداہیتءِ چارشنبے ناد ے آ پاکستان اٹی ترکیہ نا سفیر ڈاکٹر مہمت پکاسی تون سپاروکی اوڑدہی ٹی پارے۔ اوڑدہی ٹی پاکستان وترکیہ نا نیام اٹ ایلمی تعلقداری نا چندی پلوآتے مون آتخنگا۔ وزیرخزانہ و محصولات پاکستان وترکیہ نا نیام اٹ ہڑتوم آکنڈآتا تعلقداری تا مون آدننگ کن دزکش مروک آ سفیر نا خذمت آتا ستاءِ کرے۔ اوپارےکہ ہڑتوم آ ملک آتا نیام اٹ ایلمی تعلقداری ءِ ہرا اسیجائی قدر و دودوربیدہ نا آئینہ دار ءِ۔ وزیرخزانہ ترکیہ نا وزیر واپار نا کماشی ٹی واپاری ڈل انا ساڑی آ دورہ ءِ پاکستان نا ہم حوالہ ءِ تس و پارےکہ دادورہ ٹی توانائی، کشت وکشار، بنداوی پنجر و ٹیکنالوجی نا بشخ اٹی پوسکن ءُ کسر پٹنگ اٹ کمک رسینگا۔ داوخت آ ترکیہ نا سفیر پاکستان اٹی اڈکننگ نا وخت آ حکومت پاکستان نا کنڈآن تروک آ کمکاری  ومخ تفی نا ستاءِ کرے۔ اوترکیہ نا واپاری ڈل انا کندآن ہم پاکستان نا منت واری ءِ ہرفے و پارے کہ داوڑنا سرجزآتیان ہڑتوم آکنڈآتا واپار و زرکاری نا کچ آن فائدہ ہرفنگ مریک۔ فریق آک ہڑتوم آ ملک آتا نیام اٹ گڑاٹی واپار نا تین پہ تینی معاہدہ نا ہم حوالہ ءِ تسر و پاریر کہ ہڑتوم آملک آتا نیام اٹ ہڑتوم آ کنڈآتا واپار 5 ارب ڈالر اسکان ودفنگ نا ہدف نا بابت اہم گام اسے۔ اوحکومتی و بزنس ٹو بزنس رابطہ غاتا کمک اٹ پین گام گیج آتا اہمیت ءِ ہم مون آتخا۔ وزیرخزانہ دزکش مروک آ ترکیہ نا سفیر کن نیک است خواہی نا درشانی ءِ کرے و اومیت ظاہر کرے کہ او پاکستان وترکیہ نا نیام اٹ پائیدار سنگتی کن تینا کڑد ءِ آخبت ہم برجاتخک۔ اواسیجائی ہدف آتا دوئی کننگ کن کاریم ءِ برجاتخنگ نا عزم انا درشانی ءِ ہم کرے۔