اسلام آباد۔ 26 اگست (اے پی پی) بنجائی وزیر داخلہ محسن نقوی بلوچستان نا علاقہ موسیٰ خیل نا خڑک دہشت گردی نا بدترین واقعہ نا ترند انگا لوز آتیٹی مذمت ءِ کرسا پارینے کہ دہشت گرد و کمکار آک عبرتناک انجام آن بچنگ کپسہ، دہشت گردی نا جنگ اٹی سیکورٹی فورس آگتون زند انا ہرتپہ بے مٹ قربانی تسنو۔ دوشنبے نادے آ تینا بیان اٹی وزیرداخلہ محسن نقوی 23 بندغ آتا زوال کننگ نا واقعہ غا ڈکھیائی و است ہسونی نا درشانی ءِ کرے۔ وزیرداخلہ دہشت گرد آتا لغور انگا کارروائی ٹی زوال کروک آ بندغ آتا خاہوت آتون ہمدردی و ہڑزخواہی نا درشانی ءِ کرے ۔ محسن نقوی ناپاننگ ئس کہ موسیٰ خیل نا خڑک دہشت گردآک کودک مخلوق ءِ شست کرسا بربریت نا درشانی ءِ کریر، سفاکیت و ظلم انا انتہاکننگا۔ اونا پاننگ ئس کہ حکومت زوال کروک آ بندغ آتا خاہوت آتون ہمدردی نا درشانی ءِ کیک و پدسلوک خاہوت آتا غم اٹی بریبر نا شریک ءِ۔
