وزیراعظم محمد شہباز شریف نا خصوصی پارت آ پاکستانی زائر آتامیت آتے سی 130 جہاز انا کمک اٹ جیکب آباد آ سرکننگا

اسلام آباد۔ 23 اگست (اے پی پی) ایران نا شار یزد اٹی بس شکست اٹی زوال کروک آ پاکستانی زائر آتامیت آتے سی 130 جہاز انا کمک اٹ جیکب آباد آ سرکننگا۔ وزیراعظم محمد شہباز شریف نا پارت آ خصوصی جہاز میت آتے ہلنگ کن ایرانی شار یزد آ سرمسوسس۔ سرجم حوال آتا رداٹ 28 پاکستانی تا یزد بالی پٹ آ نماز ءِ جنازہ ءِ ہم خواننگا۔ ہراٹی ایرانی سپریم لیڈر نانمائندہ، گورنر یزد و پاکستانی سفیر تون اوار ایرانی کمامدارآک بشخ ہلکر۔ ایران آن دامیت آتے جیکب آباد نا شہباز ایئربیس آ اتنگا، ہراکان اوفتے اوفتا وارث آتا دوٹی تننگا۔ شہباز ایئربیس آ خاہوت آتیکن خصوصی وڑاٹ بست وبند ہم کننگاسس۔ بس شکست اٹی 28 پاکستانی زائر زوال کریر و 23 ٹھپی مسوسر ہرافتیان 14 ٹھپی تا حالیت نازر ک پاننگانے، وخت اس کہ 15 ٹھپی تے ہم پاکستان آ اتنگانے۔ شکست آن پد وزیراعظم محمد شہباز شریف زہمی خاہوت تون ہرممکن کمکاری نا خصوصی پارت ہم جاری کرے۔ تہران اٹی پاکستانی مشن ءِ غٹ ممکنہ گام گیج و کمک فراوان کننگ نا پارت ہم کرے۔ ایلو کنڈآ نائب وزیراعظم اسحاق ڈار ایران اٹی پاکستانی قونصل خانہ ءِ حالیت آتا جاچ ءِ ہلنگ نا زمواری ءِ تس و پاکستانی قونصل خانہ ٹھپی تے طبی امداد نا فراوانی و ہندی کمامدارآتون رابطہ و میت آتے پاکستان آ گدریفنگ نا بست وبند کرے۔ یزد آن لاڑکانہ اسکان مریس فاصلہ و باسن انگاموسم نا سوب آن میت آتے جہاز انا کمک اٹ اتنگا۔ ایلو کنڈآ چیئرمین پیپلزپارٹی بلاول بھٹو زرداری ناپارت آ وزیراعلیٰ سندھ سید مراد علی شاہ شکست نا شہید و ٹھپی تا مالی امداد نا ہم پڑوکرینے۔