اسلام آباد۔29جون(اے پی پی) مزن وزیر محمد نواز شریف ءَ را پنچ شمبے ءِ روچءَ فلسطین ءِ صدر محمود عباسءَ ٹیلی فون کتگءُ بہاولپور ءَ بوتگیں آئیل ٹینکر ءِ وئیل ءَ گران نیادیں جانانی زوال بوھگءِ سرءَ گمءُ ڈکھءِ درشانی کتگ۔ ٹیلیفون ءِ سرءَ گپءُ تران ءِ وھدءَ مزن وزیر محمد نواز شریف ءَ گشتگ کہ بہاولپورءِ وئیل سک باز اپسوزی وئیل ات کہ ائیدءِ موھءَ بوتگ ، سرجمیں راج اے وئیلءِ سرءَ اپسوزی اِنت۔ آئیءَ گشتگ کہ حکومت ءَ آماچیں مردمانی کمکءِ ھاترءَ دراھیں گامگیج چست کتگ اَنت۔ مزن وزیرءَ تکانسریءُ ھمدردی ءِ درشانی ءِ سرءَ فلسطینی صدرءَ را منت وار گشتگ ۔ دوھیں رھشوناں یکے دومی ءَ را ائیدءِ مراد بات داتگ۔ مزن وزیر ءَ پاکستان ءِ حکومت ءُ اُلس ءِ نیمگءَ چہ فلسطین ءِ حکومت ءُ اُلس ءِ ھاترءَ نیکیں واھشتانی درشانی کتگ۔ مزن وزیر ءَ گشتگ کہ پاکستان ءَ فلسطین ءِ آجوئی ءِ جائزیں نصب العین ءَ را مدام من اِتگ ءُ اے جدوجہد ءِ تہا فلسطین ءِ براتیں اُلس ءِ اخلاقی ءُ سفارتی حمایتءَ کنت۔
