سبی۔ 10 جولائی (اے پی پی) کمشنر سبی ڈویژن سید زاہد شاہ پارینے کہ یونیسیف نا ادارہ نا سبی ڈویژن اٹی کارکڑد ستاکڑزک داادارہ چناتا راجی آسودہی تون اوار تعلیم رکھ انسانی بنداو تیا ہلہلہ ئی امداد نا فراوانی، کنوئی آ ساف دِیر، و ایلو وڑنا گام گیج آتے پک کننگ ءِ۔ داخیال آتا درشانی ءِ او یونیسیف نا دفترنادورہ نا وخت آکرے۔ داوخت آ ڈپٹی کمشنر سبی جہانزیب شیخ ہم اوڑتون اوار ئس۔ یونیسیف نا انچارج ایمرجنسی اسپیشلسٹ شیراز بلوچ ادارہ نا بابت کمشنر سبی ءِ سرجمی اٹ حوال تس۔ اوپارے کہ چناتا جان جوڑی و شونداری، نیوٹریشن، بنداوی تعلیم، بریبری، چناتا حق انا رکھ ، چنا و لمہ نا جان جوڑی و خور آن بیدس ضمنی بشخ آتیٹی چناتیکن خاہوتی رکھ، شونداری ڈٹ آتا تشکیل ہم یونیسیف کننگ ءِ۔ کمشنر سبی سید زاہد شاہ مچ آڈویژن اٹی یونیسیف نا کارکڑد نا بابت ستاکرے و اونا کارکڑد نا ستاءِ کرے۔ اوپارے کہ یونیسیف ضلع ڈیرہ بگٹی و ضلع کوہلوآ ہم خاص چکار کے و ضلع سبی ٹی کٹ و منڈھائی کون آ علاقہ غاتیٹی ہم کاریم ءِ پک کے، و مرمر انگا علاقہ غاتیٹی ہم مخلوق شدید نیزگاری نا گواچی ءُ، یونیسیف دا علاقہ غاتیا خصوصی وڑاٹ چکار کرسا چناتا راجی آسودہی تون اوار ایلو وڑنا گام گیج آتے ہم پک کے۔
