اسلام آباد۔ 04 جولائی (اے پی پی) پاکستان داسال اکتوبر اٹی شنگھائی کمکار تنظیم (ایس سی او) نا سروک ءِ حکومت نا دیوان نا مہمانداری ءِ کیک ، اکتوبرا ٹی مروک آسروکی دیوان آن مست اسہ وزارتی دیوان اس و بڑزکو کمامدارآتا میٹنگ آتا کیہی دور مریک ہرافتے ٹی ایس سی او نا باسک ملک آتا نیام اٹ مالی، اقتصادی ، راجی ، دودوربیدہ ئی و انسانی کمکاری آ چکار کننگک ۔ داہیت ءِ دفترخارجہ نا ترجمان ممتاز زہرہ بلوچ پنچ شنبے نادے آ داڑے پریس حوال اٹی پارے۔ اوپارے کہ 2024پاکستان و ایس سی او تعلقداری کن اسہ اہم ءُ مزل اسے انتئے کہ پاکستان تون ایس سی او کونسل آف ہیڈز آف گورنمنٹ (سی ایچ جی) نا گردشی چیئرمین شپ ءِ، ہرا ایس سی او نا ارٹ میکو بڑزکو انگا فیصلہ ساز فورم ءِ۔ داحیثیت اٹ پاکستان داسال اکتوبر اٹی شنگھائی کمکار تنظیم نا سروک ءِ حکومت نا دیوان نا مہمانداری ءِ کیک۔ ترجمان پارے کہ وزیراعظم محمد شہباز شریف اینو ایس سی او پلس سمٹ آن تران کیک، وزیراعظم اہم علاقائی و جہانی ویل آتیا پاکستان نا نقطہ نظر نا شریداری ءِ کیک۔ اوپارے کہ وزیر اعظم محمد شہباز شریف آستانہ ٹی شنگھائی کمکار تنظیم نا کونسل آف ہیڈز آف اسٹیٹ و ایس سی او پلس نا اِرا سروکی دیوان تیٹی بشخ ہلنگ کن قازقستان اٹی ءِ، نائب وزیراعظم و وزیرخارجہ محمد اسحاق ڈار و کابینہ نا ایلو سینئر باسک آک و بڑزکو سرکاری آفیسر آک ہم اوڑتون اوار ءُ ۔ ترجمان پارے کہ شنگھائی کمکار تنظیم نا سروک آتا کونسل نا دیوان اٹی وزیر اعطم اہم علاقائی و جہانی ویل آتیا پاکستان نا نقطہ نظرءِ بیان کیک و دااہمیت ءِ تالان کیک کہ پاکستان شنگھائی کمکار تنظیم نا باسک ملک آتون علاقائی رابطہ و کمکاری ءِ اہمیت ایتک۔ ترجمان پارے کہ وزیراعظم محمد شہباز شریف تدوک آ دے آذربائیجان ن اصدر الہام حیدر علیوف و ترک صدر رجب طیب اردوان تون اوار آستانہ ٹی شنگھائی کمکار تنظیم نا سروکی دیوان نا وخت آ اول پاکستان۔ آذربائیجان۔ ترکی سہ فریقی سروکی دیوان اٹی بشخ ہلک۔ اوپارے کہ ہرمسٹ آ راہشونک واپار، توانائی، سیل وسوات ، دودوربیدہ ، تعلیم، ٹیکنالوجی ، جان جوڑی نا خیال و چاگڑدی کمکاری کون آ بشخ آتیا چکار کرسا سہ فریقی کمکاری ءِ ودفنگ نا عزم انا درشانی ءِ کرے۔ اوپارے کہ دا سروکی دیوان وزراء خارجہ، پارلیمنٹ نا اسپیکر و دفاعی کمامدار آتا کہول آ سہ فریقی سلابت آن پد مریک۔
