آستانہ۔ 04 جولائی (اے پی پی) وزیراعظم محمد شہباز شریف پارینے کہ شنگھائی کمکار تنظیم ڈیہہ انا الس نا راجی و زرگزرانی شونداری کن اہم کڑد ادا کننگ اٹی ءِ، ننا چیلنج آک اسٹ ءُ، اواری اٹ شونداری وشونہالی کن کاریم کننگ ناءِ، ایس سی او شونداری ڈٹ آتیکن گیگ بدل فنڈنگ نا وڑوڈول اس جوڑ کے، اوغانستان اٹی پائیدار امن ننا اسیجائی ہدف ءِ، اوغانستان دہشت گردی نا برخلاف گچین گام گیج کے تانکہ اونا گل زمین پین ملک اسے نا برخلاف کاریم اٹ اتنگپ، ریاستی دہشت گردی نا مذمت ءِ کننگے، غزہ ٹی است ہسون ظلم برجاءِ، ایس سی او فلسطین نا حالیت آتیا توار بڑزکے، پاکستان ایس سی او ءِ متحرک تنظیم اس جوڑ کننگ و ہدف آتا دوئی کننگ اٹ تینا پبی کڑد ءِ ادا کیک۔ داخیال آتا درشانی ءِ او پنچ شنبے نادے آداڑے شنگھائی کمکار تنظیم نا کونسل نا سروکی دیوان اٹی تران کرسا کرے۔ وزیراعظم پارے کہ نم تون ہیت کرسا خوشی مننگ ءِ، آستانہ اسہ زیباءُ شار اسے، گچین مہمانداری آ منت وارا ُن۔ تدوک آ اسہ سال آن ایس سی او نا چیئرنا حیثیت اٹ قازقستان گچین کڑد ادا کرے۔ بروک آ سال 2024-25کن صدر شی ججن پھنگ ءِ ایس سی او نا چیئرمین شپ ملنگ آمبارکباد پیش کینہ۔ اوپارے کہ ایس ای او ڈیہہ انا الس نا راجی و زرگزرانی شونداری کن اہم کڑد ادا کننگ اٹی ءِ۔ وزیراعظم پارے کہ ننا چیلنج آک اسٹ ءُ، ننے اواری اٹ شونداری و شونہالی کن کاریم کننگ ناءِ، ڈیہہ انا روشنا آخبت کن ننے جغرافیائی سیاسی جنگ و جھیڑہ غان تینے آجوکروئی مریک۔ گچین ٹرانسپورٹ کوریڈور و پت انا قابل سپلائی چین نا کمک اٹ ڈیہہ اٹی رابطہ غاتے بایدے ودفنگے۔ پاکستان تینا محل و وقوع نا اعتبار اٹ واپار نا اہم گزرگاہ ءِ۔ سی پیک نا کمک اٹ ایس سی او نا علاقائی رابطہ غاتا وژن نا رداٹ شونداری و شونہالی نا مزل نا دوئی کننگ نا کنڈآ ہِننگ اُن۔ ایس سی او شونداری ڈٹ آتیکن گیگ بدل فنڈنگ نا وڑوڈول اس جوڑ کے، چاگڑد نا رکھ اکن ایس ای او نا گام ستاکڑزک۔ امن و سلامتی نا قیام، زرگزرانی شونداری، نیزگاری نا چٹفنگ و چاگڑدی بدلی نا مضراثرآتون مون تننگ کن اسیجائی گام گیج نا گرج ءِ۔ بیلاروس ءِ ایس سی او ٹی اوار مننگ آ مبارکبادی ایتنہ۔ وزیراعظم پارے کہ نیزگاری نا چٹفنگ کن کاریم کروئی مریک، اوغانستان اٹی پائیدار امن ننا اسیجائی ہدف ءِ۔ پاکستان اوغانستان اٹی امن نا خواہندار ءِ۔ اوغانستان نا عبوری حکومت تون بامعنی وڑاٹ گپ وتران کروئی مریک تانکہ ہموجاگہ نا الس نا ویل آک ایسر مریر۔ اوغانستان دہشت گردی نا برخلاف گچین گام گیج کے تانکہ اونا گل زمین ءِ پین ملک اسے نا برخلاف کاریم اٹ اتنگپ، ریاستی دہشت گردی نامذمت ءِ کننگے۔ پاکستان ہروڑنا دہشت گردی چائے او ریاستی دہشت گردی مرے یا تنظیم یا بندغ اسے نا کنڈآن مرے، اونا پبی مذمت ءِ کیک۔ دہشت گردی و انتہاپسندی نا برخلاف اسیجائی و جوان گام گیج آتا گرج ءِ۔ بے گناہ بندغ آتا جون تے ہلنگ نا ہچ ءُ سوب اس اف و نئے دہشت گردی ءِ سیاسی پوائنٹ سکورنگ کن ڈھال جوڑ کننگے۔ پاکستان تعصب و پرخ آ تالان بشخنگ نا پالیسی و نسلی و مذہبی بنداو آ خار ءِ تہوتننگ نا مخالف ءِ۔ وزیراعظم پارے کہ وتواجہی ، علاقائی سالمیت و مخلوق نا بنداوی حق خودارادیت نا جہانی وڑاٹ امنا مروک اصول آتا شرف نا گرج ءِ۔ اسلاموفوبیا نا چٹفنگ کن اسیجائی گام گیج نا گرج ءِ، اسلاموفوبیا و لسانیت نا برخلاف توار بڑز کروئی مریک۔ وزیراعظم پارے کہ اقوام متحدہ نا سلامتی کونسل نا متکن آ جھیڑہ غاتا ایسری کن قابل عمل فریم ورک اس ساڑی ءِ ۔ اقوام متحدہ نا سلامتی کونسل نا قرارداد آتے ایسر نا چاری ویل آتا ایسری ءِ پک کننگ نا گرج ءِ۔ ننے سلامتی کونسل ناقرارداد آتیا عملدرآمد ءِ پک کروئی ءِ۔ غزہ ٹی انسانیت سوز ظلم برجاءِ۔ ایس سی او فلسطین نا حالیت آتیا توار بڑزکے۔ اسرائیل نا بربریت نا کارروائی تا مذمت و دمدستی جنگ بندی بایدے مرے۔ فلسطین اٹ 37 ہزار نا خڑک کودک مخلوق ءِ شہید کننگانے ہرافتے ٹی زیات کچ زالبول و چناتا ءِ۔ اسرائیل نا کنڈآن 20 لکھ فلسطینی تے بے اُرا کننگانے۔ وزیراعظم پارےکہ پاکستان فلسطین نا ویل انا 1967 آن مہالو نا سیم تا بنداو تیا اِراریاستی ایسرنا مخ تف ءِ ہرانا رداٹ فلسطینی ریاست جوڑ مرے و اونا دارالحکومت القدس مرے۔ پاکستان برجاسال اکتوبراٹی ایس سی او سروک دیوان نا مہمانداری ءِ کننگ کن سنبرینگوک ءِ۔ ایس سی او باسک ملک آتون کمکاری پاکستان نا خارجہ پالیسی نا اولیت آتیٹی اوار ءِ۔ پاکستان ایس سی او ءِ متحرک تنظیم اس جوڑ کننگ و ہدف آتا دوئی کننگ اٹ تینا پبی کڑد ءِ ادا کیک۔
