چین ئِ جوانیں کوشستاں چہ خطہ ئِ تہا پکہیئَ امنءُ ایمنی مھکم بوت کنت، پاکستان وتی ھمساھگانی گوما سنگتیں سیادی ئِ پالیسی ئِ سرئَ عمل کنت، پاکستان چینئِ گوما پچیں دل ئِ گوما کمک کنت، چینی دری کارانی وزیر ئَ چینئِ صدر شی جن پنگ ئِ نیمگئَ چہ نیکیں واھگانی کلوھ سر کتگ
اسلام آباد۔25جون (اے پی پی) صدر ممنون حسین ئَ اُمیت درشان کتگ کہ چین ئِ جوانیں ءُ ایمان داریں کوشستاں چہ خطہ ئِ تہا پکہں امنءُ ایمنی مھکم بوت کنت ءُ اے ھوالگئَ پاکستان چین ئِ گوما پچیں دل ئَ گوں کمک کنت۔ صدر ئَ اے گپ چینئِ دری کارانی وزیر وانگ ژی ئَ گوں گپءُ تران کنانئَ کتگ کہ آھاں ایوان صدر ئَ وتی ڈل ئِ ھمراھی ئَ گندءُنند کتگ۔ اے موھئَ مزن وزیر ئِ دری کارانی صلہ کار سرتاج عزیز ، دری کارانی سیکرٹری تہمینہ جنجوعہ، چین ئِ سفیر سن وی ڈونگ ، اوگان کارانی ھاترئَ چینئِ ھاسیں نمائندگ ڈینگ ڑی جن ئَ ابید مزنیں حکام ھم ساڑی بوتگ اَنت۔ چین ئِ دری کارانی وزیر مسٹر وانگ ڑی ئَ اے موھئَ خطہ ءِ تہا مھکمی ئِ ھاترئَ پاکستان ، چین ءُ اوگانستان ئِ یک جائی اجلاسئِ سوج داتگ ءُ گشتگ کہ پاکستان خطہئِ تہا مھکمی پیداک ئِ وسءُ واک ئَ داریت۔ چینی دری کارانی وزیر ئَ اے موھئِ سرئَ چین ئِ صدر شی جن پنگئِ نیمگئَ چہ نیکیں واھگانی کلوھ ھم سر کتگ کہ ایشی ئِ سرئَ صدرممنون حسینئَ آئیئَ را منت وار گشتگ ۔ صدر ممنون حسین ئَ گشتگ اوگانستان ءُ خطہ ئِ تہا مھکمی ئِ ھوالگئَ چین ئِ جوانیں کوشست آئی ئِ ساپی ئِ عکس کشی اِنت۔ آئیئَ گشتگ کہ پاکستان اوگانستان ئِ تہا امنءُ ایمنی ئِ واھشت مند اِنت تنکہ خطہئِ تہا امنءُ ایمنی پیداک کنگ بہ بیت۔ اے ھوالگئَ پاکستان ھمک سنجیدہ کوشستئِ گوما ھمراھ داری کنت۔ چینئِ دری کارانی وزیر وانگ ڑی ئَ اے موھئِ سرئَ گشتگ کہ پاکستانئَ ھرچ سکیں ساھتئَ چینئِ گوما ھمراھ داری کتگ کہ ایشی ئِ سرئَ مہ آئی ئِ شگرءُ منتئَ ادا کن اَنت۔ آئی ئَ گشتگ کہ لینئِ پیداوار ئِ تہا گیشی ئَ پد دگہ بازیں دیمروئی منصوبہ زوت سرجم کنگ بنت تنکہ لس مھلوکئِ زند ئِ جیڑءُ جنجالانی تہا کمی آرگ بہ بیت۔ آئی ئَ اُمیت پدر کتگ کہ پاکستان ئِ تہا دیمروئی ئِ عمل جاری بیت۔ آئیئَ پاک چین دوستی ئِ جوانیں کردئَ را پیلو کنگئِ سرئَ ملکئِ صدرئَ دادءُ سلام پیش کتگءُ گشتگ کہ اوبور فورم ئِ تہا مزن وزیر محمد نواز شریف ئَ باز تعمیری کرد پیلو کتگ کہ ایشی ءِ سرئَ مہ آئی ئَ را منت وار گش اَنت۔ آئیءَ چینی شہرآنی حفاظت ئِ ھاترئَ ھاسیں فورس ئِ جوڈ کنگئِ سرئَ حکومت پاکستان ئِ شگرءُ منت گپتگءُ گشتگ کہ چینی مردمانی آوار جنوکیں مردماناں آسرئَ سرکنگئَ پاکستان ئِ کرد لکھ ستاھ کرز ایت۔
