سینیٹر آغا شہباز شریف درانی وتی پت ءُ پیروکی دمگ خضدار ئَ دلئِ حرکتئِ بند بوھگئِ سوبئَ بیران بوتگ
اسلام آباد۔25جون (اے پی پی) سینیٹ ئَ پاکستان مسلم لیگ (ن) بلوچستان ئِ سینیٹر ءُ قائمہ کمیٹی برائے حکومتی اوست مندی ئِ چیئرمین سینیٹر آغا شہباز خان درانی یک شمبے ئِ روچئَ وتی پتءُ پیروکی دمگ خضدار ئَ دل ئِ حرکت ئِ بند بوھگئِ سوبئَ بیران بوتگ۔ آئی ئِ اُمبر41سال بوتگ۔ ھُدا مُرزی سینیٹر آغا شہباز خان درانی چیئرمین ضلع کونسل خضدار آغا شکیل درانی ئِ برات ءُ بلوچستانئِ سروزیر نواب ثناءاللہ خان زہری ئِ وسرک بوتگ۔ وتی جتاھ جتاھیں اپسوزی بیان ئِ تہا چیئرمین سینیٹ میاں رضا ربانی ءُ ڈپٹی چیئرمین سینیٹ مولانا عبدالغفور حیدری ئَ سینیٹر آغا شہباز خان درانی ئِ بیرانی ئِ سرئَ دل ئِ جہلانکئَ گمءُ اپسوزئِ درشانی کتگءُ ایشی ئَ را یک مزنیں نقصانے لیک اِتگ۔ آئی ئَ اللہ تعالیٰ ئَ گوں دعا کتگ کہ آ ھُدا مُرزی ئَ را وتی رحمتانی تہا جاگہ بہ دنت ءُ گمیگیں ھاندانئَ را اے وئیلئِ سگگ ئِ اوپار ئَ بہ دنت۔ چیئرمین سینیٹ ئَ گشتگ کہ آغا شہباز خان در انی ئَ ایوان بالا ئِ تہا کانود ساچگ ئِ تہا جوانیں کرد پیلو کتگءُ نیزوریں ءُ کم تبک ئِ ھکءُ بھرءُ ھاس بلوچستانئِ جیڑھءُ جنجالانی سرئَ آواز ھم چست کتگ۔ میاں رضا ربانی ئَ گشتگ کہ ھُدا مُرزی سینیٹر آغا شہباز خان درانی یک جوانے انسانے بوتگ ءُ وتی اخلاق ءُ ساپ دلی ئِ سوبئَ وتی مردمانی تہا باز نامدار بوتگ۔ چیئرمین سینیٹ ءُ ڈپٹی چیئرمین سینیٹ ئَ ھُدا مُرزی سینیٹر آغا شہباز خان درانی ئِ جمہوریتءُ ایوان بالائِ ازمتئَ را دادءُ سلام پیش کتگ۔ سینیٹ ئَ قائد ایوان راجہ محمد ظفر الحق ءُ قائد حزب اختلاف چوہدری اعتزاز احسن ئَ ھم سینیٹر آغا شہباز خان درانی ئِ بیرانی ئِ سرئَ گمءُ ڈُکھ ئِ درشانی کتگ۔ آئی ئَ ھُدا مُرزی ئِ سیاسی کوشست، ملک ئِ تہا جمہوریت ئِ مزنی ءُ بلوچستان ئِ ھاترئَ ازمت ئَ را دادءُ سلام پیش کتگ۔ آئی ئَ اللہ تعالیٰ ئَ گوں دعا کتگ کہ آ ھُدا مُرزی ئَ را وتی رحمتانی تہا جاگہ بہ دنتءُ ھاندانئَ ر اسگءُ اوپار بہ دنت۔ سیکرٹری سینیٹ امجد پرویز ملک ئَ سینیٹر آغا شہباز خان درانی ئِ بیرانیئِ سرئَ اپسوزئِ درشانی کتگءُ ھُدا مُرزی ئِ مزنیں درجگئِ ھاترئَ دعا لوٹ اِتگءُ گمیگیں ھاندانئِ گوما ھمدردی ئِ درشانی کتگ۔
