بہاولپور۔ 25جون(اے پی پی) بہاولپور احمد پور شرقیہ ءِ دمگ ءَ آئل ٹینکر ءَ آس گپتگک کہ ایشیءَ چہ تراک بوتگ ءُ 100ءَ چہ گیس مردم سُتکگءُ بیران ءُ ٹپیگ بوتگ اَنت۔ نجی ٹی وی چینل ءِ رپورٹ ءِ ردءَ بہاولپور احمد شرقیہ ءِ نزیک ءَ آئل ٹینکر ءَ را آس لگ اِتگ کہ ایشی ءَ چہ تراک بوتگ کہ بازیں مردمے سُتکگءُ بیران بوتگ اَنت۔ ریسکیو وسیلگ ءِ ردءَ آئل ٹینکر ءِ تراک ءِ وئیل راجی شاھ دگ ءِ سرءَ پل پکاءِ نزیکءَ بوتگ وھدے کہ ٹھیل ءِ ٹینکر چپی بوتگ گڈا بازیں مردمے ٹھیل ءِ زُورگءِ ھاترءَ مُچ بوتگ اَنت۔ اے وھدءَ ٹھیل ءِ ٹینکر ترکّ اِتگ کہ ایشیءِ نتیجگءَ 100مردم بیران ءُ بازینے ٹپیگ بوتگ اَنت کہ ایشانی تہا زالبولءُ چُک ھوار اَنت۔ ٹپیانی تہا گیشتر 80درسد ءَ چہ گیش سُتکگ اَنت کہ ایشی ءَ چہ بیرانیءِ کساس بوت کنت۔ ٹھیل ءِ ٹینکر ءِ تراک ءَ چہ نزیکءَ 75ءَ چہ گیش ءِ موٹر سائیکل ءُ بازیں موٹل کارے ھم سُتکگءُ تباھ بوتگ اَنت۔ فائربریگیڈ ءَ موھءِ سرءَ وتءَ سرکتگءُ آسءَ را گرءُ دار کتگ۔ ریسکیووسیلگءِ ردءَ جون ھرابیں وڑےءَ سُتکگ اَنت کہ آھانی پجار بے ڈی این اے ءَ بوت نہ کنت۔ ٹپیاناں بہاولپور وکٹوریہ نادراھ جاھءَ ھوار نزیکیں نادراھ جاھءَ برگ بوتگ کہ آھودہ بازیں مردمے ءِ جاورھال ھراب اَنت۔ ڈائریکٹر جنرل 1122، ڈاکٹر رضوان نصیر ءَ بازیں بیرانیءِ تصدیق کتگءُ ھال داتگ کہ وئیل ءِ تہا سُتکگیں 100ءِ نزیکءَ مردماناں ھندی نادراھ جاھءَ طبی کمک پھجارینگ بوھگءَ اِنت۔
