مزن وزیر ئِ صوبائی حکومتئَ را ٹپیاناں جوان تریں طبی آسراتی پھجارینگئِ ہدایت
اسلام آباد۔23جون(اے پی پی ) مزن وزیر محمد نواز شریف ئَ کوئٹہ ئَ ناشرکاری ئِ کاروائی ئَ را سک باز ایر جتگ کہ ایشیئِ تہا بے گناہیں مردم بیران ءُ بازینے ٹپیگ بوتگ۔ جمعہ ئِ روچئَ مزن وزیر کارگسئِ نیمگئَ چہ جاری بیان ئِ ردئَ مزن وزیرئَ بنجاھی ءُ صوبائی تک ئَ ھمگرنچیں حکام ئَ را اے لگوریں کاروائی ئِ تہا ھواریں مردماناں درگیجگ ءُ آھاناں دزگیر کنگئِ ہدایت کتگ۔ آئی ئَ صوبائی حکومت ئَ را اے ھم ہدایت کتگ کہ آ ٹپیاناں جوان تریں طبی آسراتی بہ پھجارین ایت۔ مزن وزیر ئَ گران نیادیں جانانی تاوان بوھگئِ سرئَ دل ئِ جہلانکئَ گمءُ ڈُکھ ئِ درشانی کتگ ءُ دعا لوٹ اِتگ کہ اللہ تعالیٰ بیران بوتگیں مردماناں وتی جوار رحمت ئِ تہا جاگہ بہ دنت ءُ گمیگیں ھانداناں سگءُ اوپار بہ دنت۔ آئی ئَ گشتگ کہ اے وڑیں لگوریں اُرش ناشرکارانی ءُ بیم کارانی گیش بوتگیں دلپروشی ءُ مایوسی اِنت کہ آ رمضان المبارک ئِ شرپ داریں ماھئَ بے گناہ شہرآناں وج کنگئَ اَنت۔ آئیئَ گشتگ کہ اے مردم اھچ وڑیں رحم ئِ قابل نہ اَنتءُ آ ناشرکاری ءُ بیمکاری ئِ ھلاپ ئَ راج ئِ جزم ئَ را نیزور کت نہ کن اَنت آ وتی بدیں آسرئَ سربنت۔
