اسلام آباد۔ 20 جون (اے پی پی) وزیراعظم نا سلاہکار قومی تاریخ و ادبی میرات عرفان صدیقی پارینے کہ جتا تہذیب آتا مطالعہ و اوفتے ٹی ہم آہنگی ودی کننگ وخت انا اہم ئُ گرج اسے۔ دا کوشست اٹی دنیا ٹی امن و ایلمی نا فضاءئِ قائم کننگ مریک۔ او سوسائٹی آف ایشین سویلائزیشن پاکستان نا ڈل اتون ہیت وگپ کریکہ۔ تنظیم نا بانی و صدر پروفیسر ڈاکٹر ذوالفقار علی قریشی نا سروکی ٹی سوسائٹی آف ایشین سویلائزیشن پاکستان نا ڈل قومی تاریخ و ادبی میرات ڈویژن اٹی سلاہکار وزیراعظم تون اوڑدہی کرے و تینا تنظیم نا اڈتننگ نا مسخت و سرجزآتا بارواٹی بریفنگ تس۔ داوخت آ سلاہکار وزیراعظم ئِ تنظیم نا اعزازی رکنیت تننگ نا سندہم پیش کننگا۔ عرفان صدیقی تنظیم نا کنڈآن تہذیب آتے تالان کننگ و اوفتا بابت ہند آتا رکھ اکن گام گیج آتا ستائِ کرساپارے کہ قومی تاریخ و ادبی میرات ڈویژن نا ذیلی ادارہ میوزیمز اینڈ آرکیالوجی نا کمک و اواری اٹ ہندن آ سرجزآتیا کاریم کننگے ہراڑآن جتا تہذیب آتا بارواٹی معلومداری عامہ بہم ئِ سرکننگ مرے۔
