اسلام آباد۔ 19 جون (اے پی پی) وزیر مملکت نیشنل ہیلتھ سروسز، ریگولیشنز اینڈ کوآرڈنیشن سائرہ افضل تارڑ ضلع ایبٹ آباد اٹی وزیراعظم نیشنل ہیلتھ پروگرام نا جاری کننگ نا وخت آ پارے کہ ہزارہ مسلم لیگ (ن) نا گڑھ ئِ ، او میاں محمد نواز شریف تون بے حد مابت کیرہ۔ بروک آ گچین کاری تیٹی نن تینا کارکڑد نا بنداو آ خیبرپختونخوا ٹی ہم نمان سرسہبی دوئی کینہ، ایبٹ آباد نا 30 ہزار 521خاہوت آتے ہیلتھ کارڈ انا کمک اٹ مفت درمان نا آسراتی فراوان کننگ انگ ئِ ۔ اوپارے کہ وزیراعظم نیشنل ہیلتھ پروگرام آ مرحلہ وار عمل درآمد کننگ انگ ئِ، اولیکو مرحلہ ٹی دا پروگرام آ 60 ضلع غاتیا عملدرآمد کننگ نا ڈٹ جوڑ کننگا ہراڑآن 3.1ملین خاہوت آتے مفت طبی آسراتی فراوان کننگ انگ ئِ۔ ساڑی مالی سال اٹی پروگرام اٹی 26ضلع غاتا ودکی کننگانے ہراڑآن پین 18ملین خاہوت آتے فائدہ رسینگک۔ اوپارے کہ وزیراعظم نیشنل ہیلتھ سروسز پروگرام نا رداٹ اسلام آباد تون اوار دیامیر، باجوڑ ایجنسی، خانیوال، نارروال ، کوہاٹ، ٹھٹھہ، سجاول و سرگودھا وغیرہ ٹی الس ئِ درمان نا مفت آسراتی فراوان کننگ انگ ئِ۔
