اسلام آباد۔ 19 جون (اے پی پی) چین پاکستان اقتصادی راہداری ڈٹ انا رداٹ گوادر انٹرنیشنل ایئر پورٹ آ اینخو نا سال جوڑ جاڑی کاریم نا بناءمریک۔ ڈٹ انا بنائی تخمینہ 23 ارب روپئی خلنگانے۔ ڈٹ ارٹ آن مسہ سال اٹی پورو کننگک، ہزار آتا کچ اٹی ہندی بندغ آتے روزگار نا وارخواہی دوبریک، گوادر ایئر پورٹ تون اوار اوار گوادر ماسٹر سٹی پلان، ایسٹ بے ایکسپریس وے ، گوادر ہسپتال نا اپ گریڈیشن و آبنوشی ڈٹ آتیا ہم کاریم ئِ ترند کننگانے، ڈٹ آتا پوروی آن گوادر پوسکن آ شار تا صف اٹی اوار مریک۔ دوشنبے نا دے پلاننگ کمیشن اٹی اڈ ہلوک سی پیک سیکرٹریٹ نا کمامدارآک ”اے پی پی“ ئِ پارے کہ اینخو سال گوادر اٹی جوڑ جاڑ و شونداری نا سال ثابت مننگ والا ئِ۔ سی پیک نا رداٹ اینخو نا سال بجلی و انفراسٹرکچر نا چندی ڈٹ آتون اوار اوار غٹ آن اہم گوادر جہانی بالی پٹ آ جوڑ جاڑی کاریم نا بناءمریک، ڈٹ ارٹ آن مسہ سال اٹی دوست مک چین نا کنڈآن تروک آ گرانٹ نا کمک اٹ پورو کننگک، کمامدارآتارداٹ وزیراعظم پاکستان نا ساڑی آ دورہ چین اٹی چینی حکومت نا کنڈآن گوادر انٹرنیشنل ایئر پورٹ نا جوڑ جاڑ کن گرانٹ منظور کننگاسس ، گرانٹ منظوری آن پد حکومت ایئر پورٹ نا جوڑ جاڑی ڈٹ آ کاریم ئِ ترند کرینے، ایئر پورٹ نا جوڑ جاڑ کن 4300 ایکڑ ڈغار جتا کننگانے۔ کمامدارآک پاریر کہ حکومت پاکستان سول ایوی ایشن اتھارٹی ئِ دا پروجیکٹ نا ترند تر پوروی ئِ المی جوڑ کننگ نا پارت کرینے۔ ذرائع نا رداٹ ، گوادر نا بندرگاہ آ 230 ملین ڈالر نا خڑچ آن جوڑ جاڑ مروک آ جہانی بالی پٹ آ دنیا نا غٹ آن بھلا مسافر بردار جہاز ’اے 380 ‘ ناشیف دڑنگ نا آسراتی ساڑی مریک، گوادر ایئر پورٹ نا پوروی آن بلوچستان خاص کر گوادر اٹی جدید سفری آسراتی دوبریک، ہراڑآن نئے بیرہ ہن وبر اٹی آسانی مریک بلکن بھلو کچ اسے آ اقتصادی سرجزآتا بناءمریک، حکومت پاکستان بلوچستان نا الس نا راجی و اقتصادی شرحالی، انفراسٹرکچر ، توانائی و جان جوڑی نا آسراتی تتون اوار داجاگہ نا شونداری آ چکار تخانے۔ سی پیک نا دروشم اٹی جاری ڈٹ نئے بیرہ علاقائی رابطہ غاتے کن اہم مریک بلکن بلوچستان تون اوار پاکستان نا غٹ صوبہ غاتا تقدیر ئِ بدلیفسا تخک۔
