اسلام آباد۔21اپریل (اے پی پی):وفاقی وزیر خزانہ و محصولات محمد اورنگزیب نے ڈیرہ اسماعیل خان میں کسٹمز کے ملازمین پر دوران فرائض منصبی فائرنگ کے واقعہ کی شدید مذمت کی ہے۔اتوار کو وزارت خزانہ کی جانب سے جاری بیان میں وفاقی وزیر خزانہ نے فائرنگ کے اس واقعہ میں کسٹمز ڈیپارٹمنٹ کے دو ملازمین کی شہادت پر شدید صدمے، رنج اور غم کا اظہار کیا ہے۔ انہوں نے کہا کہ اس کڑے وقت میں ہم مکمل طور پر سوگوار خاندانوں کے ساتھ کھڑے ہیں۔ وفاقی وزیر نے فائرنگ کے اس واقعہ میں زخمی ہونے والے کسٹمز ملازمین کی جلد صحت یابی کے لیے بھی دعا کی۔ انہوں نے کہا کہ شہداء کی قربانیاں رائیگاں نہیں جائیں گی اور اس عزم کا اعادہ کیا کہ غیر قانونی سمگلنگ کرنے والوں سے آہنی ہاتھوں سے نمٹا جائے گا۔وفاقی وزیر نے کہا کہ ایف بی آر اور پاکستان کسٹمز سمگلنگ کی لعنت کے خاتمے کیلئے بھرپور کوششیں جاری رکھیں گے۔
