راولپنڈی۔ 19 اپریل (اے پی پی) سعودی عرب نا نائب وزیر دفاع جنرل طلال بن عبداللہ آل سعود پاک فوج انا سروک جنرل سید عاصم منیر تون اوڑدہی کرے ہراٹی تین پہ تینی است خواہی نا امور ، دفاعی پیدوار و فوجی تربیت تون اوار ہڑتوم آ کنڈآتا دفاعی کمکاری ءِ پین مون آ دننگ نا گام گیج آتیا گپ وتران کننگا۔ آئی ایس پی آر نا رداٹ شرفمند آ مہمان پاک فوج انا جنرل ہیڈکوارٹر ز (جی ایچ کیو) ٹی آرمی چیف تون اوڑدہی کرے۔ آرمی چیف رائل سعودی لینڈ فورس آتا کاریم نا کچ ءِ ودفنگ کن پاک فوج انا عزم انا درشانی ءِ کرے۔ دورہ غا بروک آ شرفمند آ مہمان دہشت گردی نا برخلاف جنگ اٹی پاک فوج انا سرسہبی ، قربانی و علاقائی امن وسوگوی ٹی فوج انا کڑد انا ستا ءِ کرے۔ سعودی عرب نا نائب وزیر دفاع جی ایچ کیو ٹی پاکستان سعودی عرب دفاعی کمکاری نا پنچ می دیوان اٹی ہم بشخ ہلک۔ دیوان نا شریک کماشی ہرانا شریک کماشی پاک فوج انا چیف آف جنرل سٹاف کرے۔ فورم جہانی و علاقائی سلامتی نا چیلنج و دفاعی فورس آتیا اوفتا اثرآتیا گپ وتران کریر۔ فورم نوشتہ کرے کہ پوسکن آ ٹیکنالوجی تیٹی ترندی اٹ شونداری اِرا ایلم ملک آتا نیام اٹ دفاعی صنعتی کمکاری نا گرج ءِ ودفینے۔ ہڑتوم آ فریق آک ڈغاری، بحری و فضائی بشخ آتیٹی خاص لائخی تا دوئی کننگ آ مرکوز نقطہ نظر اٹ دفاعی کمکاری ٹی کوشست آتے سوگو کننگ نا تینا عزم انا درشانی ءِ کریر۔ فورم دا پژدر اٹ مخصوص ٹائم لائنز نا تہہ ٹی پبی مسخت دوئی کننگ کن پبی سلاہ تیا سجفے۔
