بنجائی وزیر داخلہ نا نادرا ہیڈ کوارٹراٹی دیوان آن تران

اسلام آباد۔ 18 اپریل (اے پی پی) بنجائی وزیر داخلہ محسن نقوی غیرموثر و میعاد آن زیات شناختی کارڈ آ جاری مروک موبائل سم آتے  بند کننگ نا پرمان کرسا پارینے کہ مچ آملک اٹی ماڈل نادرا دفترجوڑ کننگے، الس نا آسراتی کن ڈیتھ سرٹیفکیٹ نا فیس ءِ چٹفنگ انگ ءِ۔ او پنچ شنبے نادے آ نادرا ہیڈ کوارٹرنا سرجمی اٹ دورہ ءِ کننگ نا وخت آ دیوان آن تران کریکہ۔ نیشنل ڈیٹابیس اینڈ رجسٹریشن اتھارٹی ہیڈ کوارٹر آ بننگ آ چیئرمین نادرا لیفٹیننٹ جنرل محمد منیر افیسر بنجائی وزیر داخلہ محسن نقوی ءِ بخیرکرے۔ بنجائی وزیر داخلہ محسن نقوی نادرا ہیڈ کوارٹر نا مچ آماڑی نا دورہ ءِ کرے و پرنٹنگ تون اوار غٹ بشخ آتا معائنہ ءِ کرے۔ وزیرداخلہ محسن نقوی پارے کہ ماڈل نادرا آفس آتا جوڑ کننگ آن سروس ڈلیوری ٹی گچینی بریک و الس ءِ آسراتی ملک۔ اوپارے کہ نادرا پاکستان نا پہچان ءِ ، الس ءِ ترند رفتار سروس فراوان کننگ کن نادرا نا ماڈل آفس جوڑ کننگے۔ اوپارے کہ پنجاب اٹی ماڈل تھانہ غاتاجوڑ کننگ آن الس ءِ آسراتی اتون امیج اٹی گچینی بس۔ اوپارے کہ ودی مننگ، مرک، برام و طلاق نا سرٹیفکیٹ  آتا ویل آتے گچین وڑاٹ ایسر کننگ کن یونین کونسل دفترآتون آسان نظام اس درستی راستی کرفنگے۔ وزیرداخلہ پارے کہ شاری تا ڈیٹا نا پورو رکھ ءِ پک کننگے، الس نا آسراتی کن موبائل پلیٹ فارم آتیا پین آسراتی فراوان کننگے، ادارہ نا گام گیج آتا شونداری کن سوشل میڈیا ءِ گچین وڑاٹ کاریم اٹ اتنگے، تانکہ زیات آن زیات مخلوق دا آسراتی آن فائدہ ہرفنگ کے۔