اسلام آباد۔ 17جون (اے پی پی) وزیراعلیٰ پنجاب محمد شہباز شریف پارینے کہ ننا پنچ میکو وار احتساب مننگ ئِ ولے ولے سرکاری خردبرد و کرپشن نا ننے آ ہچ ئُ کیس اس اف، نن مہالو ہم تینے احتساب کن پیش کرین و داسہ ہم پیش کننگ اُن ، دادھرتی تون ننے بھاز پیار ئِ و دا مشک ننائُ، جے آئی ٹی ہراسوج آتے کرے ای تینا علم انا رداٹ اوفتا ورندی ئِ تسٹ، 70 سال انا تاریخ اٹی اولیکو وار گچین مروک آ وزیراعظم و داسہ گچین مروک آ وزیراعلیٰ نا وڑاٹ جے آئی ٹی نا مون آ پیش مرسا نن ثابت کرینن کہ گچین مروک آ خلقت آئین و کانود نا شرف ئِ کیرہ، ای مخ انا خل انا بہانہ ئِ کرسا جے آئی ٹی نا مون آ پیش مننگ آن انکار کتوٹ و نئے ہی ہناٹ ہسپتال اٹی داخل مسٹ، ننے فخر ئِ کہ نن ہندن ئُ باوہ اسے نا ماراُن کہ ہرانا امانت و دیانت نا خلقت اعتراف ئِ کیک ، بینک آک اودے بے پاننگ آن کڑز تسرہ ، اتفاق فاﺅنڈری نا قومیائے ہِننگ آن پد نن پونے شش ارب روپئی نا کڑز پدی تسن۔ ہفتہ نا دے جوڈیشل اکیڈمی ٹی جے آئی ٹی نا مون آ پیشی آن پد باسک قومی اسمبلی حمزہ شہباز شریف تون اوار میڈیا تون ہیت وگپ کراس شہباز شریف پارے کہ عدالت عظمی نا کنڈآن جوڑ کروک آ جے آئی ٹی کنے نوٹس اس گدریفے کہ اوفتا مون آ پیش مرسا پاناما نا معاملہ غا سوج آتا ورندی ئِ ایتیو۔ دابابت ای کمیشن نا مون آ پیش مرسا تینا مچ آ بیان ئِ ریکارڈ کرفینوٹ۔ داکان مست وزیراعظم پاکستان ہم جے آئی ٹی نا مون آ پیش مسوسس۔
