اسلام آباد۔ 16جون (اے پی پی) وزیر مملکت اطلاعات ، نشریات و قومی میرات مریم اورنگزیب پارینے کہ فلم انا جدید تخلیقی ذریعہ ئِ تینا دودوربیدہ، میرات، روایت و سکرین ٹو ورازم نا ترویج کن کاریم اٹ اتنگ وخت انا اہم ئُ گرج اسے، وزیراعظم پیکج نا رداٹ نیشنل فلم اینڈ براڈ کاسٹنگ کمیشن و نیشنل فلم انسٹیٹیوٹ و اکیڈمی نا قیام، سٹوڈیوز نا جدت آن ہم آہنگ ازباب آتیان مزین کننگک، براڈ کاسٹنگ انڈسٹری نا کمکاری کن پرائم منسٹر فلم فنانس فنڈ و فنکار آتا شرحالی کن آرٹسٹ ویلفیئر فنڈ اس قائم کننگک، مالیاتی کانود اٹی نرمی و خراج آن چھوٹ انا آسراتی ہم فراوان کننگک، درملکی فلم ساز آتے ہم غٹ ممکن آسراتی دوبریک۔ او جمعہ نا دے ترجمان حکومت پنجاب ملک محمد احمدنا اوڑدہی ٹی ہیت وگپ کریکہ۔ اوڑدہی ٹی فلم ، پروڈکشن ، براڈکاسٹنگ پالیسی و فلمی صنعت نا بحالی نا بابت وزیراعظم محمد نواز شریف نا پارت و پڑوکروک پیکج آخیال آتا درشانی ئِ کننگا۔ اوڑدہی ٹی وزیر مملکت مریم اورنگزیب پارے کہ ”فلم انا جدید تخلیقی ذریعہ ئِ تینا دودوربیدہ ، میرات، روایت و سکرین ٹورازم نا ترویج کن کاریم اٹ اتنگ وخت انا اہم ئُ گرج اسے۔ اوپارے کہ پاکستان ئِ پرامن و گھٹن آن پاک راج اسے نا وڑاٹ بایدے مچ آ دنیاٹی درست کننگے۔ گدرینگوک آ کیہی سال انا دہشت گردی نا عفریت پاکستان نا روشن و حقی دروشم ئِ چشوک کننگ نا مذموم کوشست کرے۔ اوپارے کہ ننا ہمہ جہت دودوربیدہ آن لہورنگ کننگا و منفی رجحان ودی کننگ نا افسوزناک کوشست مس۔ اوپارے کہ قوم انا ذہن تیان مایوسی ئِ چٹفنگ ننا حکومت نا اسہ پین اہم ئُ ہدف اسے۔ وزیر مملکت مریم اورنگزیب پارے کہ فلمی صنعت نا بحالی قوم ئِ تفریح نا وارخواہی فراوان کننگ و منفی رجحان آتا چٹفنگ اٹی کلیدی کڑد ادا کیک۔ حکومت پنجاب نا ترجمان ملک محمد احمد داوخت آ پارے کہ صوبائی حکومت پاکستان نا مثبت تشخص نا مون آ دننگ و فلمی صنعت نا بحالی کن ہروڑنا کمک کیک۔ اوپارے کہ دہشت گردی نا برخلاف بیانہ پیش کننگ کن فلم اسہ گچین و جوان ئُ ذریعہ اسے۔ اوپارے کہ مسلم لیگ ن نا حکومت فن ، فنکار، شاعر ، ادیب و لکھاری تا قدر ئِ ہمیشہ کرسا کیک۔
