اسلام آباد۔ 03 اپریل (اے پی پی) بنجائی وزیر حوالکاری و شینکاری عطاء اللہ تارڑ متحدہ عرب امارات نا شونداری و بدلی کن متحدہ عرب امارات نا سرکڑدہ غاتا وژن و کوشست آتا ستاءِ کرسا پارینے کہ پاکستان نا الس متحدہ عرب امارات ءِ تینا ارٹ میکو اُرا تکرہ، وزیراعظم شہباز شریف نا وژن نا رداٹ یواے ای و پاکستان نا نیام اٹ واپار و کاروباری رابطہ غاتے پین سوگو کننگ نا خواہندار ءِ۔ او متحدہ عرب امارات نا سفیر حماد عبیدابراہیم سالم الزابی تون اوڑدہی ٹی گپ وتران کریکہ۔ اوڑدہی ٹی ہڑتوم آ کنڈآتا تعلقداری، چندی بشخ آتیٹی کمکاری ءِ مون آ دننگ تون اوار تین پہ تینی است خواہی نا امور آ گپ وتران مس۔ متحدہ عرب امارات نا سفیر بشام اٹی دہشت گردی نا واقعہ نا مذمت ءِ کرے۔ بنجائی وزیر حوالکاری پارے کہ پاکستان ومتحدہ عرب امارات نا نیام اٹ اسیجائی میرات و کثیر الجہتی کمکاری آ تالان تعلقداری ءِ، پاکستان نا الس متحدہ عرب امارات ءِ تینا ارٹ میکو اُرا تکرہ ۔ اوپارے کہ ایمریٹس ایئرلائن نا اولیکو جہاز پی آئی اے نا پائلٹ ءِ بال تس ہرا ہڑتوم آ ملک آتا نیام اٹ کمکاری نا بڑزکو درور ءِ۔ بنجائی وزیر پارے کہ عزت مآب ایماندار شیخ زید نا پاکستان نا سرکڑدہ و الس تون بھاز خڑکی تعلقداری ئس۔ بنجائی وزیر حوالکاری یواے ای نا سفیر ءِ حکومت نا زرگزرانی گام گیج آتیان معلومدار کرسا پارے کہ ایف بی آر اٹی خراج اصلاحات اتنگ انگ ءِ وخت اس کہ زرگزرانی بشخ اٹی ڈیجیٹلائزیشن کن کاریم کننگ انگ ءِ۔ اوپارے کہ وزیراعظم شہباز شریف نا وژن نا رداٹ واپار و کاروباری رابطہ غاتے پین سوگو کننگ نا خواہندار ءِ۔ بنجائی وزیر حوالکاری زرگزران نا گچینی کن اسیجائی روڈ میپ اس جوڑ کننگ نا گرج آ زور شاغا۔ یواے ای نا سفیر حما دعبید ابراہیم الزابی پارے کہ ہڑتوم آ ملک آتا سرکڑدہ غاتا وژن نا رداٹ ہڑتوم آ کنڈآتا تعلقداری نا پین مون آ دننگ آ یخین تخنہ۔ یواے ای مدام مشکل وخت اٹی پاکستان نا کمک ءِ کرے، پاکستان نا زرگزرانی شونداری کن اوڑتون سلوک اُن۔ بنجائی وزیر حوالکاری متحدہ عرب امارات نا شونداری و بدلی کن متحدہ عرب امارات نا سرکڑدہ غاتا وژن و کوشست آتا ستاءِ کرے۔
