اسلام آباد۔ 03 اپریل (اے پی پی) بنجائی وزیر واپار جام کمال خان پارینے کہ پاکستان وترکمانستان نا نیام اٹ ٹرانزٹ ٹریڈ ایگریمنٹ پوروی ناخڑک ءِ، ہڑتوم آملک آتے دا واپاری معاہدہ غان بھاز زیات فائدہ دوئی مریک۔ وزارت واپار نا اعلامیہ نا رداٹ جام کمال خان داخیال آتا درشانی ءِ چارشنبے نادے آ تینا دفتراٹی پاکستان اٹی تعینات ترکمانستان نا سفیر اتاجان مولاموف تون اوڑدہی ٹی کرے۔ ترکمانستان نا سفیر بنجائی وزیر واپار ءِ اونا ساڑی آ تقرری آ مبارکبادی تس۔ اوڑدہی ٹی ہڑتوم آ ملک آتا نیام اٹ واپاری تعلقداری ءِ مون آ دننگ نا بابت ہم گپ وتران کننگا۔ جام کمال خان پارے کہ ترکمانستان تون ہڑتوم آ کنڈآتا واپاری تعلقداری ءِ پین سوگو و واپاری کچ اٹی ودکی کننگک۔ ہڑتوم آ راہشونک واپار کن پوسکن ءُ کسر پٹنگ و ٹرانزٹ ٹریڈ معاہدہ غاتا کمک اٹ واپاری کچ ءِ ودفنگ نا بابت گچین حکمت عملی تینا کننگ آ گپ وتران کریر۔ ترکمانستان نا سفیر پاکستان اٹی ہندی پیدوار نا مقابلہ اڑزان بجلی تننگ نا پیش کش کرے، داکان بیدس ایل پی جی و بجلی کون آ توانائی نا بشخ آتیٹی کمکاری ءِ ودفنگ آ ہم گپ وتران کننگا۔
