اسلام آباد۔ 02 اپریل (اے پی پی) ٹیکسٹائل مصنوعات نا برآمد آتیٹی مارچ اٹی سالانہ بنداو تیا 3.2 درسد نا نمو ریکارڈ کننگانے۔ پاکستان بیورو شماریات نا کنڈآن جاری کروک حساب وکتاب نا رداٹ مارچ 2024 اٹی ٹیکسٹائل مصنوعات نا برآمد آتیان ملک ءِ 1.30ارب ڈالر نا زرمبادلہ دوئی مس ہرا تدوک آ سال مارچ انا مقابلہ ٹی 3.2 درسد زیات ءُ۔ تدوک آ سال مارچ اٹی ٹیکسٹائل مصنوعات آتا برآمد آتا کچ 1.26ارب ڈالر ریکارڈ کننگاسس۔ فروری نا مقابلہ ٹی مارچ ٹیکسٹائل مصنوعات نا برآمد آتیٹی ماہانہ بنداوتیا 7.8 درسد نا کمتی مس۔ فروری ٹی 1.41 ارب ڈالر نا ٹیکسٹائل مصنوعات نا برآمد ریکارڈ کننگاسس۔ جاری مالی سال نا بنائی مسہ سہ ماہی تیٹی ٹیکسٹائل مصنوعات نا برآمد آتیان ملک ءِ 12.44 ارب ڈالر نا زرمبادلہ دوئی مس ہرا تدوک آ مالی سال انا ہندا مد انا مقابلہ ٹی 0.3 درسد کم ءُ۔ تدوک آ مالی سال انا ہندا مد اٹی ٹیکسٹائل مصنوعات نا برآمد آتا کچ 12.48 ارب ڈالر ریکارڈ کننگاسر۔
