پاکستان و چین نا نیام اٹ ہڑتوم آ کنڈآتا فوجی تعلقداری تیٹی پدریسہ ودکی مسنے
اسلام آباد+بیجنگ۔ 16جون (اے پی پی) چین نا بنجائی ملٹری کمیشن نا باسک جنرل فانگ فن گوئی پارینے کہ پاکستان و چین نا نیام اٹ ہڑتوم آ کنڈآتا فوجی تعلقداری ٹی پدریسہ ودکی مسنے۔ داہیت ئِ او پاکستان و چین نا 12می دفاعی و سلامتی صلابت نا وخت آ پارے۔ اوپارے کہ ہڑتوم آ ملک آتا نیام اٹ ہڑتوم آ کنڈآتا فوجی تعلقداری ٹی پدریسہ ودکی مسنے ہرانا درشانی بڑزکو کہول انا رابطہ، اسیجائی تربیت، سلہہ و ازباب و انسداد دہشت گردی نا آپریشن تیٹی عملی کمکاری آن جوانی اٹ مریک۔ اوپارے کہ چین صدرشی جن پنگ و پاکستانی سروک نا نیام اٹ طے شدہ اتفاق رائے نارداٹ ہڑتوم آ ملک آتا سلہہ بند فوج انا نیام اٹ تعلقداری تا ودفنگ و پاکستانی فوج اتون اواری اٹ چین پاکستان اقتصادی راہداری نا اسیجائی رکھ اکن تینا زمواری تے جوان وڑاٹ ادا کیک۔ اوپارے کہ چین نا فوج انسداد دہشت گردی نا رداٹ چارکڑدہ ہی کمکاری و ارتباطی میکنزم ، ہراٹی پاکستان، چین اوغانستان و تاجکستان اوار ئُ، آ کاربند سلک۔ پاکستان و چین نا سلہہ بند فوج انا نیام اٹ کمکاری نا کہول اٹی ودکی کیک و اسیجائی وڑاٹ ڈیہہ نا امن و سلامتی ئِ المی جوڑ کننگ کن گام گیج کیک۔ پاکستان و چین نا 12می دفاعی و سلامتی صلابت نا وخت آ چیئرمین جائنٹ چیفس آف اسٹاف جنرل زبیر محمود حیات و چین نا بنجائی ملٹری کمیشن نا باسک جنرل فانگ فن گوئی علاقائی وجہانی سلامتی نا بابت معاملہ و پاکستان و چین نا نیام اٹ ہڑتوم آ کنڈآتا فوجی کمکاری آ سرجم خیال آتا درشانی ئِ کریر۔ پاکستان و چین نا 12می دفاعی و سلامتی صلابت نا مثبت نتیجہ دوئی مسنے۔
