سی پیک ءِ زہمی کننگ نا اسُل موکل تفنہ، احسن اقبال

اسلام آباد۔ 01 اپریل (اے پی پی) بنجائی وزیر ڈٹ بندی، شونداری، اصلاحات و خصوصی گام گیج احسن اقبال پارینے کہ اسہ دشمن اسے ہم سی پیک ءِ زہمی کننگ نا اسُل موکل تفنہ۔ سی پیک نا بابت تینا انٹرویو ٹی بنجائی وزیر پارے کہ ہراچینی ایڑھ ایلم پاکستان اٹی شونداری ڈٹ آتیا کاریم کننگ ءُ او ننامہمان ءُ۔ اوپارے کہ حکومت تینا شاری تے ہرا رکھ ءِ ایتک اوڑآن کیہی ہنداخہ پین زیات وسیلہ و رکھ تیناچینی ایڑھ و ایلم تے فراوان کیک۔ پروفیسر احسن اقبال پارے کہ سی پیک نا دشمن سی پیک آ جلہو کننگ نا کوشست کرسا کیرہ ولے پاکستان و چین نا عزم اٹی ہچ ءُ کمتی اس بفک۔ اوپارے کہ سی پیک نا رداٹ پنچ پوسکن ءُ کوریڈور جوڑ کننگک ہرافتے ٹی پاکستان نا زرگزران اٹی نموکن ہندن ءُ ڈٹ آتا بناءِ کننگک ہرافتیان روزگار نا وارخواہی ودی مریک، ٹیکنالوجی و جدت ءِ بنداو جوڑکرسا ڈیجیٹل دور انا خواست آتیان ملک ءِ ہم گرنچ کننگک۔ داڑتون اوار اوار کوریڈور آف گرین انرجی و کوریڈور آف ریجنل ڈویلپمنٹ جوڑ کننگک۔ بنجائی وزیر احسن اقبال پارے کہ حکومت  ایران تون ٹرانسمیشن لین ڈٹ ءِ پورو کرفے۔ مکران کوسٹ اولیکو وار نیشنل گریڈ اتون اوار مس۔ دِیر انا برجاڈٹ آتیا ککاریم 6 تُو اٹی پورو کرے۔ 4 سال تدوک آحکومت  گوادر پورٹ ءِ ساف کرفتویسس ہراڑآن بھلا جہاز لنگرانداز مننگ کتوکہ، 16 تُوا ٹی داڑآ دُوارہ ڈی سلٹنگ بناکرفین ہرا داسہ پورو مسنے و داسہ گوادر ولدا بھلو بندرگاہ اس جوڑمریک ۔ دا گام گیج آتیان چینی سرکڑدہ غاتا پاکستان آ پت بحال مس و 10 سال انا سی پیک نا دودآتیا پاکستان اٹی 5 پوسکن ءُ کوریڈور جوڑ کننگ آ ہیت مس۔ دا غٹ ڈٹ آتے 2018 اسکان پورو کننگاسس۔ 2020 آن 2025 نا نیام اٹ نا وخت صنعتی کمکاری آ تالان ئس۔ داڑکن 9 اکنامک زون 2018 ٹی جوڑ کننگاسس ہرافتیا کاریم 2020 اسکان پورو مروئی ئسک۔ بدبختی اٹ تدوک آ دور اٹی دا اکنامک زون تیا کاریم پورو متو ہراڑآن زرکارآک است ترخ مرسا ہنار۔ پاکستان نا ہرا ساکھ  ءِ نن جوڑ کریسن او چٹا۔