لاہور۔ 27 مارچ (اے پی پی) لاہور ہائیکورٹ عثمان ڈار نا پن ءِ پی این آئی ایل آن کشنگ نا درخواست ءِ منظور کرسا اودے عمرہ غا ہِننگ نا موکل تس وخت اس کہ عدالت جی ایچ کیو جلہو کیس اٹی عثمان ڈار نا عبوری ضمانت آ سماعت کرسا اونا ہفت دے ئی رکھی ضمانت ءِ ہم منظور کرے۔ جسٹس شمس محمود مرزا چارشنبے نادے آ کیس انا سماعت ءِ کرے۔ سماعت اٹی درخواست گزار نا وکیل موقف تینا کرے کہ عثمان ڈار تینا خاہوت تون عمرہ کننگ ہننگ خواہک، ایف آئی اے اونا پن ءِ پرووینشل نیشنل آئیڈنٹی فیکیشن لسٹ اٹی شاغانے۔ درخواست گزار نا وکیل خواست کرے کہ عدالت اونا موکل نا پن ءِ پی این آئی ایل آن کشنگ نا پرمان کے و ایف آئی اے ءِ عثمان ڈار و خاہوت نا سعودی عرب آ ہِننگ اٹ اڑاند شاغنگ آن توننگے۔ عدالت عثمان ڈار نا درخواست ءِ منظور کرسا اونا پن ءِ پی این آئی ایل آن کشنگ نا پرمان کرسا عمرہ غا ہننگ نا موکل تس۔ عدالت درخواست گزار ءِ سیکرٹری داخلہ پنجاب ءِ شورٹی بانڈز تننگ نا پارت کرسا درخواست ءِ سرتس۔ داکان بیدس عدالت جی ایچ کیو جلہو کیس اٹی عثمان ڈار نا ہفت دے ئی رکھی ضمانت ءِ منظور کرے و درخواست ءِ سرتس۔
