کوئٹہ۔ 27 مارچ (اے پی پی)مظلوم عوامی تحریک بلوچستان نا جنرل سیکرٹری حاجی سیلاب خان اچکزئی شانگلہ نا علاقہ بشام اٹی چینی مہمان باتی تیا خودکش جلہو نا مذمت ءِ کرسا پارینے کہ دہشت گرد زموار آک پاکستان اٹی برجا شونداری ڈٹ و ہڑتوم آ ملک آتا نیام اٹ گچین تعلقداری تے نسخان تننگ اٹ لگوک ءُ، ولے دہشت گرد آک تینا ناپاک مسخت آتیٹی اسُل سرسہب مننگ کپسہ۔ داڑے جاری مروک اسہ بیان اسے ٹی حاجی سیلاب خان اچکزئی پارے کہ دہشت گرد زموار آتا ہچ ءُ دین و مذہب اس اف او بیرہ ملک اٹی دہشت گردی تالان کرسا تینا آقاتے خوش کننگ نا کوشست آتیٹی لگوک ءُ۔ اوپارے کہ بشام اٹی مہمان چینی باتی تے خودکش دھماکہ غاتا شست کروک آ بندغ آک انسان پاننگ نا ہم حقدار افس۔ اودھماکہ ٹی زوال کروک آ چینی باتی تا خاہوت آتون ہمدردی و ڈکھیائی نا درشانی ءِ کرے و حکومت آن خواست کرے کہ کہ دہشت گرد آتا برخلاف گچین کارروائی کننگے وپاکستان اٹ کاریم کروک آ چینی و ایلو درملکی باتی تا سیکورٹی ءِ پین سخت کننگے۔
