کوئٹہ۔ 27 مارچ (اے پی پی)پاکستان پیپلزپارٹی نا سینئر راہشون ترجمان صدر آصف علی زرداری بلوچستان و ضلع حب نا صدر میر علی حسن زہری بشام اٹی چینی شاری تتون اوار 6 بیگناہ بندغ آتا زوال کننگ نا ترند انگا لوز آتیٹی مذمت ءِ کرسا پارے کہ واقعہ لغور دمشن تا کارروائی ءِ، ہرانا مسخت ملک ءِ نزور کننگ ءِ۔ اوتینا مذمتی بیان اٹی پارے کہ پاکستان اٹی دہشت گردی نا واقعہ غاتا مسخت ملک اٹی ہڑدڑ تالان کننگ ءِ ۔ تینا بیان اٹی دہشت گردی نا واقعہ غاتیٹی زوال کروک آ چینی شاری تا خاہوت و مچ آ چینی قوم اتون ہڑزخواہی کرسا پارے کہ پاکستانی قوم چینی ایلم تا ڈکھیائی ٹی بریبر نا شریک ءِ۔ و واقعہ ٹی اوار لغور دہشت گرد آتے اوفتے اوفتا کروک نا سزا تننگک۔ میر علی حسن زہری پارے کہ دہشت گرد آتا آخیریکو حداسکان پدرند ءِ خلنگک و اوفتے جہنم واصل کننگک۔ اوپارے کہ کودک شاری تے شست کننگ دہشت گرد آتا لغوری نا شاہدی ءِ۔ اوپارے کہ دہشت گردی نا لغور واقعہ غاتا مسخت سیاسی و زرگزرانی سوگوی ناکنڈآ پاکستان ءِ نزور کننگ و نزوری ناکنڈآ دِکہ تننگ ءِ ہرادے اسُل سرسہب مننگ کن اِلنگپننگک۔ میر علی حسن زہری پارے کہ پاکستانی قوم تینا سیکورٹی فورس آتون ہم کوپہ و عزم وہمت اٹ دہشت گرد آتا مقابلہ ءِ کننگ ءِ و زوت دا لغور دہشت گرد آتے اوفتا ایسر اسکان سرکننگک۔ اوتینا بیان اٹی پارے کہ لغور دشمن داوڑنا کارروائی تے اٹ ننا پکا عزم ءِ توننگ کپک۔ شہید آتا دِتر نا اسہ اسہ پڑی نا حساب ءِ ہلنگک۔ میر علی حسن زہری پارے کہ آخیریکو دہشت گرد نا چٹفنگ اسکان سیکورٹی فورس و قوم انا عزم کم مفک۔ پاک فوج و ایلو سیکورٹی فورس آک وطن نا رکھ اٹی دے و نن چوکنا و دہشت گرد آتا مون آسوگو ءُ دیوال اسے آنبار سلوک ءُ، ہر کس ءِ داوڑناکارروائی نا پبی ورندی تننگ کن ہروخت تیار ءُ۔ اوداعزم انا درشانی ءِ کرے کہ ملک دشمن زموار آتا پاکستان نا امن و شونداری ءِ لتاڑنگ نا ہرکوشست ءِ بے سہب کننگک۔
