کوئٹہ۔ 27 مارچ (اے پی پی)سینیٹر ثمینہ ممتاز زہری شانگلہ نا علاقہ بشام اٹی چینی شاری تتون اوار 6 بیگناہ بندغ آتا ہلاکت نا ترند انگا لوز آتیٹی مذمت ءِ کرسا پارینے کہ واقعہ پاک چین سنگتی ءِ نزور کننگ نا سازش اسے ۔ اوتینا مذمتی بیان اٹی بشام واقعہ غا ڈکھیائی نا درشانی ءِ کرسا پارے کہ ملک اٹی ساڑی آ دہشت گردی نا واقعہ ملک ءِ نزور کننگ نا سجفوک ءُ سازش اسے ہرادے اسُل سرسہب مننگ کن النگپننگک۔ سینیٹر ثمینہ ممتاز زہری پارے کہ پاکستانی قوم واقعہ ٹی زوال کروک آ چینی ایلم تا غم اٹی بریبر نا شریک ءِ۔ اوپارے کہ مچ آ قوم بہادر سیکورٹی فورس آتے گوادر و تربت آ لغور دہشت گرد آتا جلہو آتے بے سہب کننگ آ خراج تحسین پیش کیک۔ بشام نا خودکش جلہو اٹی ہم ہندا لغور دشمن تا دُو ءِ ہرا کودک مخلوق ءِ داوڑنا کارروائی تا شست کننگ ءُ۔ سینیٹر ثمینہ ممتاز زہری تینا بیان اٹی مستی پارے کہ پاکستان وچین ایلم ملک ءُ و چینی شاری تا زوال کننگ آ مچ آ قوم غمزدہ ءِ۔ نن بحیثیت قوم بشام واقعہ نا پبی مذمت ءِ کینہ وواقعہ نا زموار و اوفتا کمکار آتے زوت جہنم واصل کننگک۔ اوپارے کہ دشمن زموار آک پاکستان و اونا سیوتی خاص کر چین نا نیام اٹ اختلاف ودی کننگ نا بے سہب کوشست کننگ ءُ ہراٹی اوفتے سرسہبی دوئی مفک۔ سینیٹر ثمینہ ممتاز زہری پارے کہ پاکستان نا سلامتی نا درملکی دشمن تینا ناپاک مسخت آتا دوئی کننگ کن پاکستان اٹ دہشت گردی ءِ مون آ دننگ اٹ اوار ءِ ولے بیدادی نا داوڑنا گندہ انگا کارروائی دہشت گردی نا برخلاف قوم انا عزم ءِ شیف شاغنگ کپک۔ سینیٹر ثمینہ ممتاز زہری پارےکہ آخیریکو دہشت گرد نا چٹفنگ اسکان سیکورٹی فورس و قوم انا عزم کم مفک۔
