اسلام آباد۔ 26 مارچ (اے پی پی) بنجائی وزیر خزانہ و محصولات محمد اورنگزیب پارینے کہ ملکی شونداری کن براہ راست خراج آتیٹی ودکی و برآمد آتیا تالان نمو المی ءِ، کلیدی خراج گزار و برآمد کنندگان ننا قومی ہیروک ءُ۔ داخیال آتا درشانی ءِ او سے شنبے نادے آ داڑے کلیدی خراج گزار و برآمد کنندگان تے ایوارڈ تننگ نا دود آن تران کرسا پارے۔ وزیراعظم محمد شہباز شریف داوخت آ مہمان خاص ئس وخت اس کہ دود اٹی وزیر آک، کلیدی ٹیکس گزار، و برآمد کنندگان و سینئر کمامدارآک بشخ ہلکر۔ وزیرخزانہ ایوارڈ ہلوک آ کلیدی خراج گزار و برآمد کنندگان تے مبارکبادی تس و پارے کہ دافک قومی ہیرو و ننا کسر نا ڈیوا ءُ۔ اوپارے کہ ہر ملک انا شونداری ونمو نا سیبو براہ راست خراج و برآمد آتیا مریک، پاکستان اٹی براہ راست خراج وبرآمد آتیٹی ودکی نا ویل ءِ ایسر کننگ المی و وخت انا خواست ءِ ۔ وزیرخزانہ پارے کہ ایف بی آر نا ری سٹرکچرنگ و اینڈ ٹو اینڈ ڈیجیٹلائزیشن کن گام گیج آتا چرجوئی برجاءِ تانکہ خراج دُزی و خراج آتیٹی رسینگ نا عمل ءِ توننگ مرے۔ داگام گیج آتیان محصولات آتیٹی ودکی مریک، خراج نا بنداو ٹی ودکی بریک، و الس نا خراج نانظام و ایف بی آر آ پت ودک۔ اوپارے کہ زرگزران نا بابت نجی بشخ انا کڑد اہمیت تخک، نجی بشخ زرگزران نا بابت تینا اہم کڑد ءِ ادا کے۔ وزیرخزانہ پارے کہ ننے برآمد آتیا تالان نموو شونداری نا گرج ءِ، داٹی اہم خراج گزار ، برآمد کنندگان و نجی بشخ ءِ پیدوار اٹی ودکی آ تینا چکار ءِ کروئی مریک وخت اس کہ حکومت پالیسی فریم ورک، پالیسی تا چرجوئی و کسب و کاریم نا کچ اٹی گچینی کن تینا کاریم ءِ کیک۔
