اسلام آباد۔ اسلام آباد۔ 14جون (اے پی پی) پاک بحریہ نا سروک ایڈمرل محمد ذکاءاللہ سری لنکا نا دورہ ٹی سری لنکا نا صدر میتھری پالاسی، وزیراعظم رانیل وکرم سنگھے ، وزیر مملکت دفاع دنیدراروان وجے وردنے تون جتا جتا اوڑدہی کرے، ہراٹی تین پہ تینی است خواہی نا معاملہ غاتیا خیال آتا درشانی ئِ کننگا۔ پاک بحریہ نا ترجمان نا رداٹ چیف آف دی نیول اسٹاف ایڈمرل محمد ذکاءاللہ دا دے تیٹی سری لنکا نا سرکاری دورہ غاٹی ئِ، تینا اینو نا اختہ ہی تیٹی او ڈیموکریٹک سوشلسٹ ری پبلک آف سری لنکا نا صدر میتھری پالاسری سینا، وزیراعظم رانیل وکرم سنگھے، وزیر مملکت دفاع دنیدراروان وجے وردنے و سیکرٹری وزارت دفاع تون جتا جتا اوڑدہی کرے۔ سری لنکن صدر و وزیراعظم تون اوڑدہی ٹی تین پہ تینی است خواہی نا معاملہ غاتیا خیال آتا درشانی ئِ کننگا۔ داکان بیدس ایڈمرل ذکاءاللہ حکومت پاکستان نا پالیسی نا رداٹ و جہانی برادری نا اواری اٹ بحرہند اٹی امن و سیکورٹی نا مون آ دننگ کن پاک بحریہ نا کوشست آتے مون آ تخا، نیول چیف داہیت ئِ ہم صفا کرے کہ پاکستان سری لنکن فوج آن تربیت، تکنیکی افرادی واک و تکنیکی مہارت نا بشخ آتیٹی ہروڑکمک کرسا کیک۔ سری لنکن سروک آک ڈیہہ ٹی میری ٹائم سیکورٹی نا مون آ دننگ اٹی پاک بحریہ نا انتھک کوشست آتا ستائِ کرے و ہڑتوم آ ملک آتا نیام اٹ تاریخی رابطہ غاتون اوار اوار ٹریننگ، تین پہ تینی دورہ، پورٹ کالز و اسیجائی مشق آتیٹی دفاعی کمکاری آ است جمی نا درشانی ئِ کریر۔ سری لنکن بڑزکو کمامدارآک ساڑی آ بھس کن جلاب اٹی پاک بحریہ نا کنڈآن امداد و کمکاری نا ہم ستائِ کریر و پاک بحریہ و پاکستانی الس نا منت واری ئِ ادا کریر۔
