اسلام آباد۔ 15 نومبر (اے پی پی) نگران وزیراعظم انوارالحق کاکڑ پوسکن آ دور انا مون تروک چیلنج آتون گچین وڑاٹ مون تننگ نا اہمیت ءِ تالان کرسا پارینے کہ پاکستان ءِ زرگزرانی وڑاٹ سوگو کننگ، ورناتا لائخی تے پبی وڑاٹ کاریم اٹ اتنگ و شونداری کن بنداوی پنجر نا تفنگ کن جوان گام گیج وخت انا گرج ءِ، بھارت ڈیہہ اٹی جنگ و جھیڑہ و نزوری ءِ تہوتننگ ءِ، بھارت اٹ اقلیت آتے بھلومشکل و سخت حالیت آتا مون تروک ءِ، پاکستان جہانی امن کن تینا کڑد ءِ ادا کرسا کیک۔ اوچارشنبے نادے آ اسلام آباد پالیسی ریسرچ انسٹیٹیوٹ نا کنڈآن مارگلہ ڈائیلاگ آن تران کریکہ۔ نگران وزیراعظم پارے کہ پوسکن آ دور اٹی پیش بروک آ چیلنج آتون مون تروئی مریک۔ پاکستان 24 کروڑ نا آبادی نا حامل ملک ءِ ہرانا آبادی نا 65 درسد 30 سال آن کم وئی ءِ ، اوفتا لائخی تے زرگزرانی وڑاٹ بایدے کاریم اٹ اتنگے۔ نن تینا انسانی وسیلہ غاتا شونداری و کسبکاری نا تعلیم اٹ پدی اُن ولے صنعتی بشخ و پردیسیک ملکی زرگزران اٹ نمان کڑد ادا کننگ اٹی ءُ۔ اوپارےکہ پاکستان قدرتی وسیلہ غاتیان مالامال ملک اسے ہرادے زرگزرانی وڑاٹ پین سوگو کننگ و دا قدرتی وسیلہ غاتے ملک اکن سرسہبی ٹی شاغنگ نا گرج ءِ، داڑتون شونداری کن بنداوی پنجر نا تفنگ وخت انا اہم گرج ءِ۔ اوپارے کہ پوسکن آ دور اٹی ڈیہہ اٹی رابطہ و راہداری تا بھاز زیات اہمیت ءِ، داڑآن واپاری سرجزآتیٹی ودکی مریک۔ چاگڑدی بدلی تا چیلنج آتا ذکر ءِ کرسا اوپارے کہ دا اسہ آخبتی خطرہ نا وڑاٹ مون آ بسنے ، داڑتون مون تننگ اسہ ملک اسے کن ممکن اف۔ چاگڑدی بدلی تتون مون تننگ کن مربوط کمکاری نا گرج ءِ۔ چاگڑدی بدلی نا منفی اثرآتے کم کننگ کن اقوام عالم ءِ گام گیج کروئی مریک۔ جہانی و علاقائی حالیت آتا بابت گپ وتران کرسا نگران وزیراعظم پارے کہ پاکستان جہانی امن کن تینا کڑد ءِ ادا کرسا کیک۔ اوپارے کہ بھارت ڈیہہ اٹی جنگ و جھیڑہ و نزوری ءِ تہوتننگ ءِ ، کشمیر نا ویل ءِ سنجیدہ بنداوتیا ایسر کننگ المی ءِ۔ کشمیر نا ویل انا بابت اقوام متحدہ نا قرارداد ساڑی ءِ۔ بھارت نا غیرکانودی کوزہ ٹی جموں وکشمیر نا مخلوق نا بنداوی حق نااستحصال ءِ کننگ انگ ءِ۔ انسانیت نا استحصال ءِ کروک آ بھارت تینے امر بھلا جمہوریت مننگ نا دعویٰ کننگ کیک۔ اوپارے کہ فلسطین اٹ کودک چناتے بربریت نا شست کننگ انگ ءِ۔ کس اس ہم 4700 چناتا خلنگ نا جواز فراوان کننگ کپک۔ کودک چناتا خون اٹ اسرائیل تینا جنونیت ءِ پورو کننگ ءِ۔ اوپارے کہ دنیا ٹی انصاف مرسا بایدے نظر برے۔ نگران وزیراعظم پارے کہ اوغانستان تون ننا متکن ، دوستانہ و برادرانہ تعلقداری ءِ۔ اوغانستان اٹی سوگوی ڈیہہ اکن بھاز المی ءِ۔ اسلام آباد پالیسی ریسرچ انسٹیٹیوٹ نا صدر ایمبیسڈر ڈاکٹر رضامحمد بشخ ہلوک آتے بخیرکرسانگران وزیراعظم انوارالحق کاکڑ نا کنڈآن ڈائیلاگ اٹ بشخ ہلنگ آ اونا منت واری ءِ ہرفے۔ اسلام آباد پالیسی ریسرچ انسٹیٹیوٹ نا صدر نگران وزیراعظم ءِ ادارہ نا تازہ پبلیکیشن اس پیش کرے۔
