غزہ۔ 14 نومبر (اے پی پی) فلسطینی وزارت جان جوڑی پارینے کہ غزہ نا الشفاء ہسپتال اٹی 7 نومولود چناتتون اوار 34 ناجوڑ زوال کرینو۔ سعودی میڈیا نا رداٹ غزہ نا پٹی نا نائب وزیر جان جوڑی یوسف ابوریش پارے کہ غزہ نا الشفاء ہسپتال نا نگہداشت نا یونٹ اٹی داخل7 نومولود چناتتون اوار 34 ناجور زوال کرینو۔ اوپارے کہ قطبی غزہ نا غٹ ہسپتال آک غیر فعال مسنو۔ غزہ نا الشفاء ہسپتال اٹی اسرائیلی فوج انا بمباری ٹی انکیو بیٹرزایندھن ناکاختی نا سوب آن بند مسوسس ۔ غزہ ٹی ساڑی جہانی ادارہ جان جوڑی نا کمامدارآک خبڑدار کریر کہ ہسپتال اٹی 3 ہزار آن زیات مریض و طبی عملہ پناہ ہلکنو ہرافتے تون ایندھن، دیر وخور انا بھاز کاختی ءِ۔ الشفاء ہسپتال ناتہہ ٹی ساڑی جہانی ادارہ جان جوڑی نا کمامدارآتون رابطہ غان پد ادارہ نا سروک ٹیڈروس ادہانوم پارے کہ بدبختی اٹ الشفاء ہسپتال پین بطور ہسپتال کاریم کننگ ءِ اِلانے۔ ہسپتال 3 دے آن بیدس بجلی و دیر آن ءِ ۔ داکان مست اقوام متحدہ نا انسانی امداد نا ادارہ پارے کہ غزہ نا کل 36 آن 20 ہسپتال غیرفعال مسنو۔
