کوئٹہ ۔ 14 نومبر (اے پی پی)پاکستان پیپلزپارٹی زالبول ونگ انا صدر غزالہ گولہ، جنرل سیکرٹری زرینہ زہری ئسک پارینو کہ پیپلزپارٹی دا ملک اٹی سیاست کننگ نا بھاز بھلو قیمت اس اداکرینے، ولے بھٹو نا فلسفہ اینو ہم ننا است آتیٹی زندہ ءِ، پیپلزپارٹی مدام الس تون سلوک مسنے داڑآن ایڑتر کہ حالیت آک اخہ در مشکل ءُ یا ننے اخہ در مخالفت و مشکل آتون مون تروئی تمنگ کیک نن تینا ملک اکن مدام جنگ ترساکینہ، پارٹی نا چیئرمین و مرکزی سرکڑدہ غاتا کوئٹہ غا سرمننگ آ اوفتے جم وجوش اٹ بخیر کننگک۔ 30نومبر آ کوئٹہ ٹی مروک آ جلسہ انشاء اللہ مسکوہی مروک آ غٹ جلسہ غاتا ریکارڈ ءِ پرغک۔ داڑے جاری مروک اسہ بیان اسے ٹی اوفک پاریر کہ پیپلزپارٹی الس نا مخ تفی اٹ 8 فروری 2025ء آ مروک آ لس گچین کاری تیٹی الس نا وونٹ آتے اٹ سرسہب مرسا حکومت جوڑ کرسا پاکستان نا قسمت بدل مریک۔ اوفک پاریر کہ لیول پلیئنگ فیلڈ ملپننگ آن پد ہم مستین آنبار انشاء اللہ داوار ہم پاکستان پیپلزپارٹی لس گچین کاری تیٹی سرسہبی دوئی کیک انتئے کہ پاکستان پیپلزپارٹی الس نا جماعت ءِ و مدام الس نا حق اکن توار بڑزکرینے۔ اوفک پاریر کہ زرگزرانی تنکی و کبینی نا دا دوراٹی ورناتے مشکل آتیان کشنگ پیپلزپارٹی تینا فرض تکک ، نن اقتدار اٹی بسن تو ورناتیکن گچین تعلیم و کسبی تربیت نا وارخواہی فراوان کینہ تانکہ مخلوق زرگزرانی مشکل آتیان پیش تمنگ کے۔ اوپارے کہ 30نومبر آ پاکستان پیپلزپارٹی نا یوم تاسیس نا وخت آ کوئٹہ ٹی مروک آ جلسہ بلوچستان ناسیاسی تاریخ نا غٹ آن بھلا جلسہ مریک۔
