اسلام آباد۔ 13 نومبر (اے پی پی) نگران بنجائی وزیر حوالکاری ، شینکاری و پارلیمانی امور مرتضیٰ سولنگی و نگران وزیراعلیٰ خیبرپختونخوا جسٹس (ر) سید ارشد حسین شاہ نا نیام اٹ ٹیل فون آ رابطہ مس ہراٹی بروک آ گچین کاری، میڈیا نا بشخ آتیٹی کمکاری و صحافی تا ویل آتون اوار ایلو اہم امور تیا گپ وتران مس۔ نگران بنجائی وزیر حوالکاری جسٹس (ر) سید ارشد حسین شاہ ءِ نگران وزیراعلیٰ نا منصب ءِ سنبھالنگ آ مبارکبادی ترسا گچین کاری عمل ءِ صاف، شفاف و بے کنڈ ہلوک جوڑ کننگ کن الیکشن کمیشن ءِ ہر ممکن کمک و آسراتی فراوان کننگ نا عزم انا درشانی ءِ کرے۔ گچین کاری تیٹی میڈیا ءِ ہرممکن آسراتی فراوان کننگ آ امنا کننگا۔ بنجائی وزیر حوالکاری مرتضیٰ سولنگی پارے کہ نگران حکومت آجوئی درشانی سلاہ غا پورو یخین تخک۔ نن آئین نا رداٹ تینا زمواری تے سرتننگ اُن، غٹ سیاسی جماعت آتے اسہ وڑ وارخواہی فراوان کننگ انگ ءِ، خیبرپختونخوا نا صحافی تا ویل آتے اولیتی بنداو تیا ایسر کینہ۔
