لاہور۔ 13 نومبر (اے پی پی) نگران وزیراعظم نا خصوصی کمکار و چیئرمین پاکستان علماء کونسل حافظ محمد طاہر محمود اشرفی پارینے کہ غزہ ٹی جنگ داسہ انسانیت نا جنگ جوڑ مسنے، فلسطین اٹ غٹ مذہب آتا مخلوق ءِ شست کننگ انگ ءِ ، دابربریت دمدستی بندمرے۔ داخیال آتا درشانی ءِ او دوشنبے نادے آ قومی کمیشن بین المذاہب مکالمہ و انٹرنیشنل انٹرفیتھ ہارمنی کونسل نا کنڈآن کیتھیڈرل چرچ لاہور اٹی اڈہلوک یکجہتی فلسطین کانفرنس آن تران کرسا کرے۔ طاہر اشرفی پارے کہ داجنگ اٹ داتم اسکان 11 ہزار آن زیات فلسطینی شہید مسنو ہرافتے ٹی 4 ہزار آن زیات چنااوار ءُ، فلسطین نا ہسپتال آتیٹی ہزار آٹھپی شاری زند و مرک انا کشمکش اٹی اختہ ءُ۔ اوپارے کہ یواین او نا رپورٹ نا رداٹ مسہ لکھ بندغ غزہ ٹی دوائی، غذاو خور آن محروم ءُ۔ اوپارے کہ غزہ ٹی جہانی ادارہ غاتا دفتر، چرچ و ہسپتال آتے بھاز بے وڑ جارحیت نا شست کننگ انگ ءِ ہراکہ جنگی کانود نا پاش آن پاش خلاف ورزی ءِ، جہانی برادری دا بربریت نا نوٹس ءِ ہلے۔ طاہر اشرفی پارے کہ پاکستان نا غٹ مذہب آتا سرکڑدہ غاک دا تاریخی چرچ آن خواست کیرہ کہ جنگ بندی کرسا غزہ ٹی کمکی سرجزآتے دمدستی بحال کننگے۔ اوپارے ک اقوام متحدہ تون اوار غٹ جہانی ادارہ غاک ہم جنگ بندی نا خواست کننگ اٹی ءُ۔
