کوئٹہ۔ 13 نومبر (اے پی پی) پاکستان پیپلزپارٹی کوئٹہ ڈویژن نا صدر خیرمحمد ترین پارینے کہ پاکستان پیپلزپارٹی ملک و الس نا حقی السی و جمہوری سیاسی جماعت ءِ ہرا ہردور اٹ جمہوریت نا ہیت ءِ کرے، بلاول بھٹو زرداری داقوم انا آخیریکو اومیتءِ و ہموداملک ءِ تنکی تیان کشنگ کیک ہنداسوب آن اگہ بلاول نا کسر ءِ توننگ نا کوشست کننگاتو داجمہوریت نا برخلاف سازش اس مریک الس ءِ تینا مرضی اٹ تینا نمائندہ گچین کننگ ناموقع فراوان کننگے، پاکستان پیپلزپارٹی نا 56 می یوم تاسیس نا بابت کوئٹہ ٹی جلسہ بھلو اہمیت اس تخک پاکستان پیپلزپارٹی نا کارندہ غاک جلسہ نا سرسہبی کن تینا السی رابطہ مہم ءِ ترند کیر۔ داڑے جاری مروک اسہ بیان اسے ٹی خیرمحمد ترین پارے کہ پیپلزپارٹی اولیکو دے آن ہلیس اینو اسکان بیرہ السی خذمت آ یخین تخک و ہندا ننا سیاست نا بنداو ءِ ورناتے روزگار، تعلیم، جان جوڑی نا آسراتی و ایلو مشکل آتیان نجات ترفنگ پیپلزپارٹی نا منشور ءِ، الس چاہک کہ روزگار و تعلیم نا وارخواہی فراوان کون آ کاریم پیپلزپارٹی ہی کننگ کیک۔ اوپارے کہ پاکستان پیپلزپارٹی نا چیئرمین بلاول بھٹو زرداری پارٹی نا 56 می یوم تاسیس نا وخت آ کوئٹہ ٹی جلسہ لس نا پڑو ءِ کرسا پارٹی کارندہ غاتا است ءِ کٹانے۔ اوپارے کہ پاکستان پیپلزپارٹی نا مرکزی سرکڑدہ غاتا کوئٹہ غا سرمننگ آ اوفتے جم و جوش اٹ بخیرکننگک و یوم تاسیس نا وخت آ مروک آ جلسہ بلوچستان نا سیاسی تاریخ نا غٹ آن بھلا جلسہ مریک۔ اوپارے کہ پاکستان پیپلزپارٹی نا کارندہ غاک جلسہ نا سرسہبی کن الس تون خڑکی رابطہ تخر۔
