ہرنائی۔ 13 نومبر (اے پی پی) مسکوہی سینئر صوبائی وزیر حاجی نورمحمد خان دمڑ پارینے کہ الس ننے کارکڑد نا بنداوآ وونٹ ایتک، سلابتی جرگہ ٹی ہزار آبندغ آتا بشخ ہلنگ آن پک مس کہ الس ننتون تفوک ءِ۔ داخیال آتا درشانی ءِ او سنجاوی ٹی سلابتی جرگہ غان تران کرسا کرے۔ جرگہ غان کارروان نا قبائلی راہشون حاجی ملک محمد غوث پانیزئی، حاجی جان چیئرمین، ملک محمد ایاز دمڑ، ملک بڈواقا، چیئرمین ضلع کونسل زیارت عبدالستار کاکڑ، وائس چیئرمین حبیب اللہ پانیزئی، عبدالباقی ترین، کلیم کاکڑ، نوراللہ جان سارنگزئی ، ملک اورنگ کاکڑ، سردار عتیق تارن، و ایلو عالم دین و کارروان نا سینئر باسک آک تران کریر۔ سلابتی جرگہ ٹی ہزار آ بندغ آتا بشخ ہلنگ نا سلابتی جرگہ ٹی کارروان نا کارندہ و سینئر باسک آک حاجی نور محمد خان دمڑتون ہم کوپہ سلنگ و اُرااُرا گچین کاری مہم ءِ چلیفنگ نا پڑوکریر۔ سلابتی جرگہ غان تران کرسا مسکوہی سینئر صوبائی وزیر حاجی نور محمد خان دمڑ پارے کہ ننا پنچ سال انا کارکڑد الس نا مون آٹے ، الس نا ویل آتے ایسر کننگ کن دےے و نن ءِ اسٹ کرین، حلقہ ٹی سد آ تعلیمی ادارہ غاتا جوڑ کننگ، جان جوڑی ہند آتا جوڑ کننگ، اِراہزار نا خڑک ورناتے ملازمت آتیا تعیناتی قومی شاہراہ تا تفنگ کن ارب آتا منظوری آن بیدس حلقہ گچین کاری ٹی چنکو بھلو سد آ ڈٹ آتے منظور کرفینن، ننا پنچ سال انا کارکڑد کس اسے آن ڈکھوک اف۔
