اسلام آباد۔ 10 نومبر (اے پی پی) پاکستان اسہ وارولدا داہیت انا درشانی ءِ کرینے کہ او اقوام متحدہ نا سلامتی کونسل نا قرارداد آتا رداٹ جموں وکشمیر نا جھیڑہ نا انصاف اٹ و پرامن ایسری کن تینا کشمیری ایلم و ایڑھ تا سیاسی، سفارتی و اخلاقی مخ تفی ءِ برجاتخک۔ دفترخارجہ نا ترجمان ممتاز زہرہ بلوچ جمعہ نادے آ پریس حوال اٹی پارے کہ 6 نومبر آپاکستانی الس و مچ آ دنیا نا کشمیریک جموں ٹی نومبر 1947اٹی مروک آ کشت وخون نا زہمی تے یات کریر 76 سال مست ہری سنگھ نا ڈوگرہ فوج ہرادے ہندو انتہاپسند راشٹریہ سویم سیوک سنگھ (آرایس ایس) نا مخ تفی دوئی ئس ڈٹ بندو منظم وڑاٹ کم و ود 2 لکھ 37 ہزار مسلمان تا کشت وخون ءِ کریسس۔ ترجمان دا قتل عام نا زہمی تے یات کرسا اوفتے شاندار لوز آتیٹی خراج عقیدت پیش کرے و پارے کہ دا اجتماعی زوال کروک آ تازموار آتا احتساب نا خواست ءِ کینہ۔
