اسلام آباد۔ 10 نومبر (اے پی پی) پاکستان سعودی عرب نا دارالحکومت ریاض اٹی (پگہ) ہفتہ نادے آ مروک آ بھلا اسلامی سروکی کانفرنس نا خیرمقدم ءِ کرینے۔ اوآئی سی نا سروک دیوان غزہ غا اسرائیلی جلہو آتا ردعمل اٹ بٹنگ انگانے ہراڑان شاری آبادی ءِ بھلو خطرہ اس مون تروک ءِ او اسہ بھلو انسانی تنکی اسے ودی کرینے۔ دفترخارجہ نا ترجمان ممتاز زہرہ بلوچ جمعہ نادے آ پریس حوال اٹی پارے کہ پاکستان ءِ فلسطینی الس نا برخلاف کروک آ گندہ انگا ڈوہ آ بھاز گڑتی ءِ انتئے کہ اسرائیلی فوج غزہ ٹی تینا دہشت گردی و بربریت نا مہم ءِ برجاتخانے۔ اوپارے کہ اسہ تُو آن زیات وخت آن غزہ نا الس بدترین اجتماعی سزانا گواچی ءُ۔ ترجمان پارے کہ اسرائیلی فوج کودک شاری تا اندھادھند قتل عام کرسا اوفتے خور، دیر، ہنکین و طبی امداد آن رزاک اٹ محروم کرسا انسانیت نا برخلاف ڈوہ انا ارتکاب کننگ ءِ۔ اوپارے کہ فاسفورس بمب آتا کاریم اٹ اتنگ و نیوکلیئر ہولوکاسٹ نا دھڑکو زیرِ کوزہ مخلوق نابرخلاف تننگ انگ ءِ ہرافتے اوفتا گل زمین آن زوراکی اٹ بے دخل کننگ انگ ءِ۔ ترجمان پارے کہ غزہ نا سنگین حالیت آتا رداٹ اقوام متحدہ نا سلامتی کونسل امن ءِ برقرارتخنگ و دمدستی وبے شڑت آن جنگ بندی ، گھیڑ ءِ چٹفنگ تون اوار دمدستی و بلاروک ٹوک انسانی امداد نا بناکن تینا زمواری تے پورو کننگ کن کاریم کے۔ اوپارے کہ اسرائیل نا پشت پناہی کروک آتے اسرائیل ءِ باورکرفنگے کہ او آبادکاری، جبری نقل مکانی و فلسطینی الس نا نسل کشی نا تینا ڈٹ آتے یلہ کے۔ ترجمان پارے کہ اسہ کوزہ گر واک اسے نا وڑاٹ اسرائیل چارمیکو جنیوا کنونشن نا رداٹ تینا زمواری تے پورو کےو غزہ ٹی کشت وخون ءِ دمدستی وڑاٹ بایدے چٹفے۔
